Буряад Уласай Хүдөө ажахын болон эдеэ хоолой яаманай мэдэлэй Гүрэнэй комиссиие ударидажа ябаһан Баян Гончикжамсуевич Жигжитов аймагай хүгжэлтэдэ өөрынгөө хубита оруулһан юм. Дүн ехэтэй дурасхаалта жэлнүүд тухайгаа тэрэ иигэжэ хөөрэнэ:
- Би 2000 ондо түрэл аймагайнгаа засаг даргаар һунгагдаа һэм. Тиихэдэ хүшэрхэн саг байгаа – шэнэдхэн хубилгалгын 90-ээд онуудай хойшолонгууд эли бэлэй. Багшанарай салин, үхибүүдэй тэдхэмжэ гэхэ мэтэ саг соогоо түлэгдэхэгүй. Энэ үри шэриһээ гарахын тула нилээд оролдожо ажаллаабди. Гэхэтэй хамта, минии хүдэлхэ үедэ тон хүйтэн үбэлнүүд тудажа, термометрэй зурлаа 50 градусһаа доошоо унажа, адуу малаа алдахагүйн тула арга мүрөө бэдэрээ аабзабди даа. Эдэ мэтын бэрхэшээлнүүд намайе, хамта хүдэлһэн зонииемни хатуужуулаа, бэрхэшээл дабахын тула шүдөө зуугаад, хам ородог бэлэйбди. Мүнөө һанахадамни, наһанаймни дурасхаалта жэлнүүд байгаал даа. Амжалтануудшье бии hэн. Горитой ажал хэгдээ даа.
Аймагай мүнөөдэрэй хүгжэлтэ тэрэ сагһаа һабагшатай гэжэ hанагдана. Захиргааниие компьютер гэхэ мэтын мүнөө үеын хэрэгсэлнүүдээр гүйсэд хангажа шадаабди. Инвентаризациин дүнгүүдээр, хангамжын талаар манай аймагай захиргаан Буряад Улас дотороо түрүү һуурида гараа һэн. Тиихэдэ мэргэжэлтэд дуталдадаг байгаа - 160 ставка hомонуудта нэмэгдээ .
Хүдөө ажахын талаар хэлэхэ болоо һаа, үүлтэртэ ажахынууд тиихэдэ байгуулагдаа. “Комсомольский” ажахы 2002 ондо казах үүлтэрэй үнеэдые үсхэбэрилдэг боложо, үүлтэртэ малай ажахы гэһэн нэрэтэй болоо hэн.
Һуралсал болбосоролой талаар һайн дүнгүүд туйлагдаа hэн. Шэтын эмнэлгын академитэй нягта харилсаа тогтоожо, тэндэһээ багшанар манай аймагта шалгалта үнгэргэжэ, hураха үхибүүдые абадаг болоо hэн. Квотын гуримаар нютагаймнай олон үхибүүд эмшэд боложо гараа. БГУ-тай харилсаа холбоон байгуулагдаа. Энэ hургуулиин багшанарта хэдэн гэрнүүдые барижа үгөө һэмди.
Нютагай залуу халааниие дэмжэхэ зорилготой “Яруунын залуушуул” гэжэ ниитын эмхи байгуулагдаа.
Нарһатада оршодог соёлой байшан заһабарилагдажа, болбосон түхэлтэй болгогдоһон юм.