Мүнөө жэлэй Захааминай Сурхарбаанда шэнэ наадан боложо, олоной һонирхол татаа. Тэрэ һонин наадаяа «Эрэ, оодорыш!» гэжэ нэрлэһэн байна.
Захааминай залуушуулай болон спортын таһагай гол мэргэжэлтэ Арсалан Батуев хөөрэхэдөө, энэ урданай наадан юм. Монгол туургата арад хара багаһаан үхибүүдээ мориндо һургадаг байһан. Тиихэдээ нэн түрүүн морёор урилдуулжа, тиигээд эмниг мори һургаха дүршэлдэ һургадаг байһан. Ехэ болоходонь, эмээл дээрэ ябаад барилдаха шадабарида һургадаг байһан гэхэ.
Байлдаанай эхиндэ мэргэн һур харбагшад шалгардаг. Шиидхэхы тулалдаанда һэлмэ жадада бэрхэшүүл тодордог. Эсэстэнь үлэһэн дайсадые бар хүсэтэйшүүл улаан гараараа даража, илалта туйладаг байгаа.
Бүхэшүүлэй энэ наадан монгол болон түүрэг зарим арадуудай дунда мүнөөшье эмхидхэгдэдэг юм. Мори унаһан бүһэтэй хүбүүд хоёр-хоёроороо ээлжээгээр гаража тулалданад. Тиихэдээ бүһэнүүдһээн барилсажа, нүгөөдэхиеэ моринһоо унагаахые оролдоно. Энэ нааданда мориндо бэрхэ аад, үшөө хүсэ шадалтай хүбүүд хабаадана. Илангаяа шанга хүлтэй хүбүүд илана гэжэ адаглахаар байгаа.
«Эрэ, оодорыш!» нааданай тулалдаанай үедэ
Сэнгэ Ринчиновэй гэрэл зурагууд