​Һур харбаашанай һүртэй һайндэр

Эгэтын Адаг хадаа Ярууна аймаг орожо ерэһэн айлшадые бусадһаа түрүүн угтажа абадаг ехэ хүндэмүүшэ нютаг юм. Эндэхи зон бурханһаа үгтэһэн талаан бэлигтэй. Бэе бэетэеэ эб эетэй ажаһуудаг гэжэ уужам аад, жэрэ жэбжэгэрхэн хорёотой гудамжануудыеншье хараад, тэрэ дороо ойлгохоор.

6 дугаар һарын 3-най үдэр Эгэтын Адагай һанаамгай зон түрэл аймагайнгаа ерэн жэлэй ойдо зорюулжа, «Һур харбаашанай үдэр» үргэн дэлисэтэйгээр эмхидхэбэ. Ушар юуб гэхэдэ, энэ нютагтамнай һур харбажа, сүлөө сагаа шэмэглэдэг буряадууд олон. Харин иимэ ниитэ гаршагтай һайндэр бүтээхэдээ, холо ойгуур суутай «Победа» ажахыгаар нэгэдэһэн нютагаархин һонин-һонин зүйлнүүдые бэелүүлбэ. 

Жэшээнь, найрта бууһан Ярууна аймагай захиргаанай болон сомонуудай ноёд һомон дэгэлнүүдээ үмдэжэ ерэһэн бэеэрээ, номо годлёор харбажа туршаба. 

Харин мэргэжэлтэ һур харбаашад юрэ ластии ходо харбажа тэмсэхын хажуугаар Буряад Уласай түүхэдэ анха түрүүшынхиеэ хурдан хүлэгэйнгөө гүйдэл дунда сагаалса харбажа, онодогоороо олониитые баясуулба. 

Эгэтын Адагаархинай өөрын хүсөөр эмхидхэһэн ехэ найрта Мухар-Шэбэр, Хэжэнгэ, Хори, Захаамин, Сэлэнгэ, Түнхэн аймагуудай, Улаан- Үдын, Үбэр Байгалай хизаарай Агын Буряадай тойрогой Дульдарга аймагай һур харбаашад мүрысөө. 

Хурдан хүлэгэй гүйдэл дунда харбажа, хүндэтэй гурбадахи һуури Захаамин аймагай Бэлигтэ Цыремпилов эзэлээ. Хоёрдохи һуурида Хори аймагай Владимир Лыгденов гараа. Харин түрэһэн тоонто нютаг Эгэтын Адагаархинайнгаа урманда нютаг хүбүүн Вячеслав Цыдендамбаев бусадһаа мэргэн байшаба. 

Арад зондо энэ мүрысөөн ехэл һайшаагдажа, бидэ туршахамнай, бидэ туршахамнай гэлдэхэдэнь, иимэ арга боломжо дуратай хүн бүхэндэ олгогдоо. Хамтын «Победа» ажахын түрүүлэгшэ, Ярууна аймагай һунгамалнуудай зүблэлэй гэшүүн тарган гэгшын хони шан болгожо табижархиба. Эгэтын Адагай арад зоной урманда нютаг хүбүүн Мүнхэ Гатаповта хүрэхэ мори мордоод харбаха эрэшье, эхэнэршье хүн байбагүйл даа. 

Һур харбагшад

"Ярууна» сониной дурадхаһан гэрэл зурагууд