Мүнөөдэр, июниин 23-да, Ярууна аймагай байгуулагдаһаар 90 жэлэй ойн баярай хэмжээ ябуулганууд эхилбэ. Аймагай түб Нарһата һууринда олониитын баяр ёһололой суглаан үнгэрбэ.
Ярууна аймагай гулваа Цыденжап Шагдаровай хэлэһэнэй ёһоор, үглөөгүүр Нарһата һууринай түб талмай дээрэ Ородой Холбоото Уласай Буддын заншалта Сангхын, Ярууна аймагһаа гарбалтай ламанар уншалга үнгэргэһэн байна. Тиихэдэ Буряадай болон Улаан-Үдын митрополит Савватий баһал һайндэрэй уншалга үнгэргөө. Шажан мүргэлэй түлөөлэгшэд яруунынхидай ажана тэнюун ажабайдалай түлөө болон һайндэрэй хэмжээ ябуулгануудай амжалтатай үнгэрхын тула зальбарһан байнад.
Баяр ёһололой суглаанда аймагай хүтэлбэрилэгшэ Цыденжап Шагдаров элидхэл хэбэ. Тэрэ Ярууна аймагай байгуулалта болон хүгжэлтын шатанууд тухай хөөрэжэ, хүдөө ажахы болон байгаалиин нөөсэнүүдые ашаглалга аймагай хүгжэлтын гол һалбари болоно гэжэ тэмдэглэбэ. Цыденжап Шагдаровай хэлэһэнэй ёһоор, аймагай эгээл ехэ баялиг олон яһанай арад зон болоно. Эдэл хүнүүд аймагаа хүгжөөжэ, алдар нэрыень дээрэ үргэн ябаха гэжэ аймагай хүтэлбэрилэгшэ хэлэбэ.