758
Буряад Уласай Засагай газарай ниигэмэй хүгжэлтын талаар түрүүлэгшын орлогшын уялгануудые дүүргэгшэ Владимир Матханов болон Арадай Хуралай Түрүүлэгшэ Цырен-Даша Доржиев гэгшэд Ярууна аймагай баяр ёһолой хэмжээ ябуулгада хабаадаба. Тэдэнэр аймагай гулваа Цыденжап Шагдаровта “Урал” түхэлэй түймэр сарадаг машина абахаар 5,6 млн. түхэригэй сертификат бэлэг болгон барюулба.
Олониитын баяр ёһололой суглаанай үедэ Владимир Матханов Ярууна аймагай ажаһуугшадые 90 жэлэй ойн баяраар амаршалжа, энэ аймаг ажабайдалай хүгжэлтын алишье һалбарида алдаршанхай юм гэжэ тэмдэглэбэ. Ярууна аймагай хүгжэлтэдэ горитой хубитаяа оруулһан дайнай болон ажалай ветерануудта сэдьхэлэй дулаан үгэнүүдые тэрэ хэлэбэ. Тиихэдэ Владимир Матханов Ярууна аймагһаа гарбалтай болон тэндэ ажаһуугшадта гүрэнэй, засагай газарай шагналнуудые барюулба.
