736
Буряад Уласай 15 нютагай засагай байгууламжануудай хүтэлбэрилэгшэд Яруунай аймагай гулваа Цыденжап Шагдаровые болон ажаһуугшадые аймагай байгуулагдаһаар 90 жэлэй ойн баяраар амаршалба. Аймагай хүтэлбэрилэгшэдэй дунда заншалта болоһон ёһоор, дарганар амаршалгын дулаан үгэнүүдые хэлэжэ, бэлэгүүдые барюулаа. Тиихэдээ тэдэнэр Ярууна аймагай амжалтанууд тухай тэмдэглэбэ.
Баунтын-эвенкнүүдэй аймагай хүтэлбэрилэгшэ Николай Ковалёвой хэлэһэнэй ёһоор, Ярууна аймагай хүгжэлтэдэ газарай нөөсэнүүдые ашаглалга нүлөөлхэ.
Мүнөөдэр, июниин 23-да, Ярууна аймагай байгуулагдаһаар 90 жэлэй ойн баярта дашарамдуулан баярай хэмжээ ябуулганууд эхилээ гэжэ һануулнабди. Буряад Уласай Засагай газарай ниигэмэй хүгжэлтын талаар түрүүлэгшын орлогшын уялгануудые дүүргэгшэ Владимир Матханов болон Арадай Хуралай Түрүүлэгшэ Цырен-Даша Доржиев гэгшэд Ярууна аймагай баяр ёһолой хэмжээ ябуулгада хабаадажа, аймагай гулваа Цыденжап Шагдаровта “Урал” түхэлэй түймэр сарадаг машина абахаар 5,6 млн. түхэригэй сертификат бэлэг болгон барюулаа.
