746
Буряад Уласай Кабанск аймагта “Горная школа” гэһэн бүхэроссиин залуушуулай эрдэмэй-практическа 6-дахи хуралдаан июлиин 8-11-нэй үдэрнүүдтэ үнгэргэгдэхэ. Байгалай газарай нөөсэнүүдые ашаглалгын колледжын суглуулагдамал команда энэ хэмжээ ябуулгада уласаа түлөөлхэ.
Залуушуулай эрдэмэй-практическа хуралдаанда 70-һаа дээшэ мэргэжэлтэ шүүбэришэд, ашагта малтамалнуудые үйлэдбэрилгын компанинуудай, засаг зургаанай, олониитын болон эрдэмэй һалбаринуудай түлөөлэгшэд хабаадаха. “СУЭК”, “Сибирский Антрацит”, “Росгеология” гэһэн хуби ниилүүлһэн, “Компания «Востсибуголь”, “Сибнииуглеобогащение” гэһэн хизаарламал харюусалгатай, “Стойленский ГОК” гэһэн хуби ниилүүлһэн нээмэл бүлгэмүүдэй 220-ёод залуу мэргэжэлтэд эрдэмэй-практическа хуралдаанай үедэ һуралсал гараха. Тиихэдэ тэдэнтэй хамта Санкт-Петербургын хадын, Уралай гүрэнэй болон Алас Дурна зүгэй федеральна ехэ һургуулинуудай оюутад энэ хэмжээ ябуулгада хабаадаха.
Ородой Холбоото Уласай 20 можо нютагуудай ашагта малтамалнуудые үйлэдбэрилгын һалбариин 800-аад түлөөлэгшэд “Горная школа” гэһэн эрдэмэй-практическа хуралдаанда һуралсал гараһан байха юм.
Ород гүрэндэ шулуу нүүрһэ олзоборилдог болоһоор 295 жэлэй ойн баярта болон Шахтёрой үдэрэй 70 жэлэй ойдо дашарамдуулан, “Горная школа – 2017” гэһэн хэмжээ ябуулга эмхидхэгдэнэ. Ородой Холбоото Уласай Болбосоролой болон эрдэм ухаанай яаманай Үхибүүдые болон залуушуулые хүмүүжүүлгын гүрэнэй бодолгын департаментын хэмжээ ябуулгануудай түсэбэй ёһоор энэ хуралдаан үнгэргэгдэнэ.
Ородой Холбоото Уласай Элшэ хүсэнэй, Болбосоролой болон эрдэм ухаанай яамануудай, Залуушуулай хэрэгүүдээр федеральна агентство болон Буряад Уласай Засагай газарай дэмжэлгээр “Молодёжный форум лидеров горного дела” гэһэн эмхи, “Надёжная смена” жаса, “СУЭК”, “Росгеология”, “Сибирский Антрацит” гэһэн хуби ниилүүлһэн, “Компания «Востсибуголь” гэһэн хизаарламал харюусалгатай, “Стойленский ГОК” гэһэн хуби ниилүүлһэн нээмэл бүлгэмүүд “Горная школа - 2017” гэһэн хэмжээ ябуулга эмхидхэбэ.
