897
Мүнөөдэр, июниин 28-да, Буряад Уласай Арадай Хуралай һунгамалнуудай ээлжээтэ сесси эхилбэ. Буряад Уласай Засагай газарай Түрүүлэгшын Нэгэдэхи орлогшо Иннокентий Егоров 2016 ондо хэгдэһэн ажал тухай тоосохо юм.
Мүнөөдэр үнгэргэгдэхэ сессидэ һунгамалнууд 45 асуудалаар зүбшэн хэлсэхэ юм. Тэдэнэй тоодо, 2016 оной бюджет, 2017 оной бюджедтэ хубилалта оруулха, бюджет хоорондын харилсаанай хуули гэһэн асуудалнуудаар һунгамалнууд зүбшэхэ.
Сессиин үедэ Ородой Холбоото Уласай Федерациин Зүблэлэй Хүндэлэй грамотаар үнэн сэхэ ажалай түлөө Сергей Бужинаев, “Трудовая доблесть” гэһэн медаляар Галан Гунзынов, Буряад Уласай Арадай Хуралай Хүндэлэлэй грамотаар Андрей Меделянов гэгшэдые шагнаба.
Буряад Уласай Арадай Хуралай Түрүүлэгшэ Цырен-Даша Доржиев нэгэ мандадтай һунгуулиин 16-дахи тойрогто июниин 19-дэ үнгэргэгдэһэн нэмэлтэ һунгалтада түрүүлһэн 49-дэхи һургуулиин захирал Людмила Попова олонтой танилсуулба.
Байгша оной февраль һарада Ородой Холбоото Уласай Федеральна Суглаанай болон Федерациин Зүблэлэй гэшүүн - Буряад Уласай Засагай газарай түлөөлэгшэ, академик Арнольд Тулохоновой һайн дураараа гүрэнэй парламентhаа болиходонь, “Ариг Ус” телекомпаниин юрэнхы захирал Татьяна Мантатова тэрэнэй орондо томилогдожо, уласай парламентда депутадай hуури сүлөө болоhон байгаа. Тиигэжэ Буряад Уласай Арадай Хуралда нэмэлтэ һунгалта үнгэргэгдэһэн байна гэжэ һануулнабди.
