​Спортын орёо асуудалнууд һанаа бодол хүлгөөнэ

Спортын халаан бэлдэхэ талаар Буряад Уласта ажал гүйсэд дүүрэнээр ябуулагданагүй. Арадай Хуралай һунгамалнууд энэ байдалые яагаад һайжаруулхаб гэhэн шанга хөөрэлдөө эмхидхэбэ. 

Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ Цыденжаб Батуев 2014 ондо спорт хүгжөөхэ талаар ехэ хэмжээнэй парламентска суглаа үнгэргэһэнөө һануулба.

- Тэрэ суглаан дээрэ табигдаһан олон асуудалнууд шиидхэгдээ. Эгээл тэндэ Спортын талаар яаман байгуулха тухай хэлсээ һэмди. Тиигэжэ яаманай байгуулагдахада, ехэ найдалтай байгаабди. Харин мүнөө хараад үзэхэдэ, гүйсэд дүүрэнээр ажал хэгдэнэгүй. Энэнь ехэ һанаа зобооно, - гэжэ Цыденжаб Батуев шангарба. 

Жэл хахад урда тээ шэнэ халаан бэлдэхэ талаар асуудал табигдаа hэн. Хүүгэдэй спортын һургуулинууд ажалаа мүнөө сагта таарамаар ябуулха зэргэтэй гэжэ хэлэгдэһэн байна. Тэдэниие болбосоролой һалбариһаа Спортын яаманай мэдэлдэ дамжуулха тухай хөөрэлдөөн Буряад Уласта бэелүүлэгдээгүй зандаа үлэнхэй. Ородой Холбооной Юрэнхылэгшэ Владимир Путинай энэ даабариие ганса манай улас дүүргээгүй байhаар. 2017 оной ноябрь hарада энэ талаар шалгалта болохо. Теэд Буряад Улас юугээ харуулхаб? Спортын болон залуушуулай бодолгын талаар сайдай орлогшо Дмитрий Штэпа гэгшын хэлэһээр, харуулха дансанууд бии юм. 

Энэ хүлгөөтэ асуудалаар элидхэл хэһэн Ородой Холбоото Уласай Спортын яаманай мэргэжэлтэн, манай нютагай басаган Елена Сандаковагай тэмдэглэһээр, ерээдүй халаан бэлдээгүй hаа, нютагаа суурхуулха хүн олдохоо болихо. Тиимэһээ энээндэ гол анхарал хандуулха хэрэгтэй.

Арадай Хуралай hунгамал Баир Доржиев Хурамхаан аймагай спортын һургуули жэшээ болгон дурдаба.

- Мүнөө үедэ Хурамхаанай хүүгэдэй спортын һургуулида 14 һоригшод тоологдоно. Тэдэ яагаад аймагай бүхы hуурин, тосхонуудта хүдэлжэ шадахаб. Мүн салингыньшье бага. Урда жэлнүүдтэ тэндэ 20 гаран хүн хүдэлдэг һэн, - гэжэ Баир Доржиев хэлэнэ. – Минии һанамжаар, hуурин бүхэндэ барилдаагаар һоригшо хүдэлбэл, һайн байгаа. Спортын бусадшье янзануудаар хүдөөгэй үхибүүдэй бэеэ һорижо байбал, бүри hайн бэлэй… 

Арадай Хуралай һунгамалнууд спортын талаар дээгүүр дүнгүүдые туйлаhан тамиршадта һара бүриин мүнгэн тэдхэмжэ үгэхэ тухай хуули бэлдэжэ байһан тухайгаа мэдүүлбэд. Жэшээлхэдэ, суута Бальжинима Цыремпилов мүнөө сагта ямаршье ажалгүй, хаанаһаашье салин абанагүй. Тэрэ хоолойгоо тэжээхын тула элдэб коммерческэ мүрысөөнүүдтэ хабаадана. Бальжинимада адли тамиршад манай Буряадта олон юм. 

- Буряад ороноо холо ойгуур суурхуулһан тамиршадта наһанай амаралтада гарахадань лэ, пенси дээрэнь мүнгэн нэмээгдэнэ. Теэд бүхы тамиршад 60 наһа хүрэтэрөө ажаһуунагүй бшуу. Тиимэһээ тэдэнэй амжалтануудыень хараадаа абан, һара бүри багаханшье һаа, мүнгөөр хангаха хэрэгтэй, - гэжэ Арадай Хуралай һунгамал Валерий Доржиев хэлэнэ. 

Эндэ мүн лэ Улаан-Үдэдэ һур харбалгын лукодром болон мүльһэн ордон бариха тухай асуудалнууд табигдаа. 2018 ондо одоол һур харбалгын түб баригдажа эхилхэ гэжэ Буряад Уласай спортын болон залуушуулай бодолгын талаар сайдай уялгануудые дүүргэгшэ Баир Ангуров олониие баярлуулба. Тиихэдэ мүльһэн ордон хаана, хэзээ баригдахаб гэжэ хэлсэгдэжэ байна.