​"Сурхарбаан - 2017" арад зоноо урина

Июлиин 1-2-ой үдэрнүүдтэ бүгэдэ Буряадай найр «Наадан- Сурхарбаан - 2017» Ивалгын аймагта, мүн уласай ниислэл Улаан-Үдэ хотодо эмхидхэгдэхэнь. 

Найрай түрүүшын үдэр хурдан хүлэгүүд урилдаха. Улаан-Үдэ хотодо ипподромой үгы һэн тула Ивалгын дасанай дэргэдэ оршодог мори урилдадаг газар Буряадай, мүн тиихэдэ хүршэ Эрхүү можын, Үбэр Байгалай хизаарай түрүү адуушадые, тэдэнэй һориһон хурдан хүлэгүүдые хүлеэн абаха. Мори урилдаа нээлгын баяр июлиин 1-дэ үглөөнэй 10 сагта эхилхэ гэжэ эмхидхэлэй хороон мэдээсэнэ. 

Заншалта ёһоороо Буряад Уласай Толгойлогшын уялгануудые гүйсэдхэгшэ Алексей Самбуевич Цыденов түрүүтэй Буряад Уласай Засагай газарай тушаалтад, XXIV Бандида хамба лама Дамба Аюшеев түрүүтэй Ородой Холбоото Уласай Буддын шажанай Сангхын лама санаартан, Ивалгын аймагай захиргаанай хүтэлбэрилэгшэд арад зониие амаршалха. Нээлгын баярай удаа морид урилдажа эхилхэ. 

Сурхарбаанай гол хэмжээ ябуулганууд июлиин 2-то үнгэргэгдэхэ байна. Улаан-Үдэ хотын Түб стадион дээрэ үглөөнэй 10 сагһаа Буряад ороной бүхэшүүл барилдажа захалха, холо ойроһоо бууһан мэргэшүүл hур харбаха, шатаршад буряад шатараар мүрысэхэ байна. Мүн тиихэдэ бүдүүн сарбуута улад гиир үргэхөөр хүлеэгдэнэ. Үдын хойно, 14 сагһаа хойшо, шагай наададаг, һээр шаадаг тамиршад мүрысэжэ эхилхэ. Мүн тиихэдэ юрын харагшад шагай наадажа, һээр шаажа һураха аргатай байха. Үшөө тиихэдэ энэ үдэр эгээл энэ сагhаа Буряадай залуушуул ёохор наадажа һураха юм. 

Үдын хойно 16 сагhаа бүхэли үдэрөөрөө үргэлжэлһэн тэмсээнүүдэй тон шандааһатайнуудынь, тон мэргэнүүдынь «Наадан-Сурхарбаан - 2017» гэжэ буряад- монгол арадай найрай абаргын солодо хүртэхын түлөө тэмсэжэ эхилхэ. 

Хамаг тэмсээнүүдэй түгэсэжэ, абаргануудай нэрэнүүдэй хүсэд элирһэн хойно орой үдэшэ баяр ёһололой оршон байдалда шалгарагшадта үнэтэ болон дурасхаалта бэлэгүүд олониитын нюдэн дээрэ барюулагдаха байна. Удаань Буряад Уласай оперын болон эстрадын одод аялга дуунуудаа дэлгэжэ, ирагуу хүгжэмөө хангюурдажа, бултаниие хужарлуулха байна.