Мүнөөдэр, июниин 28-да, Буряад Уласта һургуулияа эрхимээр дүүргэгшэдые алтан медаляар шагналгын баяр ёһолол хаа хаанагүй үнгэргэгдэбэ.
Улаан-Үдэ хотын һургуулинуудай эрхим һурагшадые Соведүүдэй талмай дээрэ амаршалба. Мүнөө жэл 231 һурагшад алтан медаляар һургуулияаа дүүргэбэ. Тэдэнэй 37-ниинь гүрэнэй ниитэ нэгэ шалгалта тушаажа, 100 балл абаһан байна. Урдахи жэлнүүдтэй жэшэхэдэ, 2017 оной дүнгүүд улам дээшэлээ. Буряад Уласай Болбосоролой болон эрдэм ухаанай яаманай сайдай уялгануудые дүүргэгшэ Баир Жалсановай хэлэһээр, иимэ үндэр амжалта һурагшадай нэтэрүү абари зан, багшанарай оролдолго болон түрэлхидэй дэмжэлгээр туйлагдаба.
Буряад Уласай Арадай Хуралай Түрүүлэгшын орлогшо Вячеслав Ирильдеев эрхим һурагшадые амаршалба.
- Һургуули дүүргэгшэдэй иимэ үндэр амжалта туйлаһандань баясанаб. Эдэнэр өөртөө түсэбүүдые табижа, тэрэнээ бэелүүлжэ шадаха болонхой, - гэжэ Вячеслав Ирильдеев һургуули дүүргэгшэдтэ хандаба.
Ородой Холбоото Уласай Гүрэнэй Дүүмын һунгамал Алдар Дамдиновай хэлэһэнэй ёһоор, багшанар, түрэлхид һургуули дүүргэжэ байһан үхибүүдэй эрхимээр һургуулияа дүүргэхын тула, горитой хубитаяа оруулаа.
- Түрэлхидэйнгээ дэмжэлгээр, таанар, мүнөө гэр бүлынгөө, угайнгаа омогорхол болобот. Хаанашье ябаа һаа, ямаршье тушаал эзэлээ һаа түрэл һургуулияа, түрэл хотоёо ходо һанажа ябагты. Буряад Уласай Засагай газар, Улаан-Үдэ хотын захиргаан һуралсалаа дүүргэхэдэтнай, һайн салинтай ажалтай болохытнай тулада бүхыгөөрөө оролдохо, - гэжэ Алдар Дамдинов хэлэбэ.
Байгша ондо Улаан-Үдэ хотын һургуулинуудта 2219 үхибүүд 11-дэхи класс дүүргэбэ.
Анна Огороднигой гэрэл зураг.