891
Буряад Уласай Арадай Хуралай ээлжээтэ сессиин үедэ бюджет хоорондын харилсаанууд тухай хуули абтаба. Тэрэ 2018 оной январиин 1-һээ бэелүүлэгдэжэ эхилхэ, тэрэнэй ёһоор, татабариин 50 процентнь нютагай засагай байгууламжануудта дамжуулагдаха юм.
Буряад Уласай Мүнгэн һангай сайдай уялгануудые дүүргэгшэ Игорь Шутенковой хэлэһээр, абтажа байһан хуулиин ёһоор, нютагай засагай байгууламжануудай бюджедтэ бюджет хоорондын трансферт бага болохо.
Тиихэдэ татабариин 50 процентын нютагай засагай байгууламжануудта дамжуулагдахада, гаргашын уялгануудые бэелүүлхэ субсидиин зарим хуби тэдэнэртэ үгтэхэеэ болихо юм гэжэ мэдэгдэбэ.
- 50 процент дамжуулхадамнай, нютагай засагай байгууламжануудта энэл тоогоор бага болохо гү? – гэжэ Буряад Уласай Арадай Хуралай Түрүүлэгшэ Цырен-Даша Доржиев асууба.
– Татабари бага болгогдоходо, гаргашын уялгануудые бэелүүлхэ субсиди баһал бага болохо – 2018, 2019, 2020 онуудай бюджет бүрилдүүлхэдэ энэ хараалагдаха,- гэжэ Игорь Шутенков хэлэбэ.
«Адлил болонол даа», - гэжэ парламентын түрүүлэгшэ тайлбарилба.
Арадай Хуралай хороонуудта энэ асуудал уридшалан зүбшэн хэлсэгдэһэншье һаа, зарим һунгамалнууд һанамжануудаараа хубаалдаба. Тэдэнэй һанамжаар, энэ хубилалта хүдөө нютагуудай засагай байгууламжануудта бэшэ, харин хотодо олзотой байха.
-Тоололгын методикын зүбшье һаа, хүдөө нютагуудта олзын хэрэг эрхилэлгэ хүгжөөхэ, татабариин мүнгэ үлээхын тула бидэ юу хэнэбибди? Хүдөө аймагууд мүнгэгүй үлэшэхэгүй гү? – гэжэ һунгамал Екатерина Цыренова асууба.
Нэгэ жэлээр энэ хуули абаха тухай һунгамал Леонид Селивёрстов дурадхаба. Буряад Уласай Засагай газар 2016 ондо энэ хуули абалгые буруушаагаа, теэд юундэ мүнөө Засагай газар һанамжаяа хубилгааб гэжэ ойлгоногүйб гэжэ һунгамал хэлэбэ.
-Энэ хуули магад хэрэгтэй. Харин тэрэниие нэгэ жэлээр абажа, яагаад хүдөө нютагуудай засагай байгууламжанууд ажалаа эрхилхэб гэжэ хараад үзэел. Юундэ 3 жэлээр энэ хуули абанабибди? Нютагай засагай байгууламжануудта хотынхидто орходоо олзын хэрэг эрхилэлгэ доро. Тиимэһээ хотодо татабариин 30 процентыень, харин хүдөөгэйхидтэ 70 процентыень үлээбэл, тиигэбэл зүйтэй байха,- гэжэ тэрэ хэлэбэ.
Леонид Селивёрстовой хэлэһэнэй ёһоор, уласай парламент иимэ хуули абахадаа, тэрээнтэй адли аймагуудта олзын хэрэг эрхилэлгые мүнгөөр дэмжэхэ жаса ехэ болгохо, үгы гэбэл аймагуудта олзын хэрэг эрхилэлгэ “хүл дээрээ гарахагүй”.
Һунгамал Баир Цыреновэй хэлэһэнэй ёһоор, абтаһан хуули олзын бага болон дунда хэрэг эрхилэлгэ хүгжөөхэдэ, туһатай байха.
- 2018-2020 онуудай бюджет бүрилдүүлхэдээ, Засагай газарта гаргашын уялгануудые бэелүүлхэ субсиди бага болгоохогүй гэжэ Буряад Уласай Засагай газарта дурадхал оруулжа, энэ хуули абая,- гэжэ Буряад Уласай Арадай Хуралай Түрүүлэгшэ Цырен-Даша Доржиев дурадхаба.
Удаань һунгамалнуудай олонхинь хүдөө аймагуудта татабариин 50 процент үлээхэ тухай хуули абахын түлөө дуугаа үгэбэ.
