​Этигэлэй хамба ламын һургаалнууд шэнжэлэгдэнэ

Yнгэрһэн амаралтын үдэрнүүдтэ, июниин 24-25- да, Ивалгын дасанай Буддын шажантанай ехэ һургуулида XII дугаар Бандида хамба лама Даша-Доржо Итигэловтэ зорюулагдаһан хуралдаан уласхоорондын хэмжээндэ 6-дахияа эмхидхэгдэбэ.  Анха түрүүшынхиеэ иимэ хуралдаан 10 жэлэй саана үнгэргэгдэһэн юм. 

Yглөөнэй 9 сагһаа хабаадагшад олоор субажал байгаа. Хитадай Yбэр Монголһоо болон хүршэ Монгол оронһоо түлөөлэгшэд ерээ. Уншалгын удаа Этигэлэй хамба ламада мандала үргөөд, хуралдаа нээлгын баяр ёһолол эхилээ. 

Буряад Уласай Арадай Хуралай хорооной түрүүлэгшэ Цыденжаб Батуев, Москвада оршодог «Түбэдэй Байшанай» толгойлогшын орлогшо Надежда Беркенгейм гэгшэд баяраа мэдүүлээ. Монгол ороной Буддын шажантанай зүгһөө Бимбажав гуай, Yбэр Монголой һүзэгтэнэй үмэнэһөө Сэчэнбаатар гуай гэгшэд үгэ хэлээд, Ородой Холбоото Уласай Буддын шажантанай Сангхада бэлэгүүдые барюулаа. 

Бандида хамба лама Дамба Аюшеев үгэ абахадаа, иигэжэ хэлэбэ: 

- 2012 онһоо Этигэлэй хамба лама та олондоо үдэр бүри һургаалнуудые зорюулжа байна. Эдэ һургаалнуудынь дары Фейсбук хуудаһанда толилогдоод, түби дэлхэйгээр тарана. Ород болон буряад хэлэнүүд дээрэ дамжуулагдахаһаа гадна, Yбэр Монголой 300 мянгаад ажаһуугшадта хуушан монгол бэшэгээр дамжуулагдана. 

Алтанавчаа эгэшэ hургаалнуудые шууд монгол бэшэгтэ оруулдаг болонхой. Энэ хуралдаанай онсо талань гэхэдэ, Этигэлэй хамба ламын чойнжин Бимба ламын дамжуулжа байдаг үдэр бүриин һургаалнууд хабаадагшадта тараагдаад, тэдэнь тайлбарилагдана, шэнжэлэгдэнэ. 2012 онһоо Этигэлэй хамба лама 147 сэдэбээр 810 һургаал дамжуулһан байна. 

Агууехэ ёгоозор гүн ухаа шудалагша, хооһон шанар оложо шадаһан багша, хамба лама Даша-Доржо Итигэловэй мүнхэ бэе 15 жэлэй саана газар дороһоо гаргагдажа, олоной гайхал болоһоор. Энэ үзэгдэлдэ эрдэмтэд харюу оложо шадаагүй байна. 

Буряад Уласай Толгойлогшын уялга дүүргэгшэ Алексей Цыденов үгэ хэлэжэ байна

Ородой Холбоото Уласай Буддын шажанай заншалта Сангхын мэдээсэлэй албанай гэрэл зурагууд