720
Мүнөөдэр, июлиин 5-да, Федеральна харгын агентствын хүтэлбэрилэгшын орлогшо Георгий Прокуронов албанай хэрэгээр Буряад Улас ерэжэ, “Аюулгүй, һайн шанартай харгынууд” гэһэн федеральна түсэлдэ ороһон харгын заһабарилга шалгаха юм. Тиихэдээ, 100-дахи кварталнууд руу ошоһон харгы заһабарилгада хэгдэжэ байһан ажал сэгнэхэ.
Буряад Уласай Засагай газарта Георгий Прокуроновой хүтэлбэри доро автомашинын ябадаг харгы шадарай хангалгын газарнуудай хүгжэлтэдэ зорюулагдаһан зүблөөн үнгэргэгдэхэ юм. Буряад Уласай Транспортын, элшэ хүсэнэй болон харгын ажахы хүгжөөлгын сайдай уялгануудые дүүргэгшэ Сергей Козлов, Үйлэдбэриин болон худалдаа наймаанай сайдай уялгануудые дүүргэгшэ Алексей Мишенин, Улаан-Үдын сити-менеджер Александр Аюшеев, аймагуудай хүтэлбэрилэгшэд, “Буряад Уласай автомашинын ябаха харгынуудай хүтэлбэриин” болон эмхи зургаануудай түлөөлэгшэд энэ зүблөөндэ хабаадаха. Олзын хэрэг эрхилэгшэд болон машинада түлишэ хэдэг бэеэ даанги станциин түрүүлэгшэ Егор Алхунсаев хэмжээ ябуулгада баһал хабаадалсаха.
Ородой Холбоото Уласай 27 хотодо “Аюулгүй, һайн шанартай харгынууд” гэһэн федеральна түсэл бэелүүлэгдэхэ гэжэ хараалагдаһан байгаа. Харин 2017 ондо Улаан-Үдэ, Калининград хотонууд эндэ нэмэгдэжэ оруулагдаа. Улаан-Үдэ хотын харгы заһабарилгада 11 млрд түхэриг гаргашалагдаха юм гэжэ һануулнабди.
