943
Ростех гэһэн гүрэнэй корпорациин бүлэг хүтэлбэрилэгшэд Буряад Уласай Толгойлогшын уялгануудые дүүргэгшэ Алексей Цыденовтэй хамта Улаан-Үдэдэ перинатальна түбэй барилга тухай зүбшэн хэлсэбэ.
Ростех гэһэн гүрэнэй корпорациин авиационно кластерэй үйлэдбэриин захирал Анатолий Сердюков, КРЭТ концернын захиралнуудай зүблэлэй түрүүлэгшэ, Ростехнадзорой толгойлогшо Алексей Алешин, Буряад Уласай Толгойлогшын уялгануудые дүүргэгшэ Алексей Цыденов гэгшэд Буряад Уласай Элүүрые хамгаалгын, Барилгын болон гэр байрын ажахы шэнэдхэлгын яамаануудай хүтэлбэрилэгшэдтэй хамта перинатальна түбэй барилга хараһан байна.
Барилгын газарта үнгэргэгдэһэн зүблөөнэй үедэ тэдэнэр зүбшэжэ, табигдаһан болзорто барилга дүүргэхэ тухай шиидхэбэринүүдые абаһан байна.
2016 ондо перинатальна түбэй барилга дүүрэхэ ёһотой байгаа. Харин хари гүрэнүүдэй түхеэрэлгэнүүдые Ород гүрэндэ бүтээгдэһэн түхеэрэлгэнүүдээр һэлгэхэ шиидхэбэриһээ, барилгын түсэл зохёогшод баһал һэлгэгдэһэн шалтагаанһаа боложо, энэ түбэй барилга саг соогоо дүүргэгдээгүй юм. 2017 оной март һарада Буряад Уласай Толгойлогшын уялгануудые дүүргэгшэ Алексей Цыденов Ростехэй толгойлогшо Сергей Чемезовтэй уулзаха үедөө байгша ондо энэ түб ашаглалгада тушаагдаха гэжэ хэлсэһэн байгаа.
Баригдажа байһан перинатальна түб мүнөө үеын шэнэ оньһон эмнэлгын хэрэгсэлнүүдээр хангагдажа, 120-ёод эхэнэрнүүдтэ нэгэ доро туһа хүргэгдэхэ аргатай юм. Энэ барилгада 3 млрд шахуу мүнгэн һомологдоно.
