877
Хэжэнгын интернат-һургуулиин “Илалта” гэһэн бага футболой команда “Ближе к звёздам” гэһэн Бүхэроссиин тамирай мүрысөөнүүдэй түгэсхэлэй шатада Буряад Уласаа түлөөлхэ эрхэдэ хүртэбэ. 2017 оной сентябриин 24-һөө октябриин 15 болотор энэ мүрысөөн “Артек” гэһэн Уласхоорондын хүүгэдэй түбтэ үнгэргэгдэхэ юм.
“Илалта” команда Гусиноозёрск хотодо хүдөө нютагуудай һургуулинуудай дунда эмхидхэгдэһэн уласай, удаань Алтайн хизаарай Барнаул хотодо можо нютагуудай мүрысөөнүүдтэ илалта туйлаһан байна. Энэ командын бүридэлдэ 12 хүн ородог юм. Тэдэниие бэеын тамирай багша Эрдэм Мангатаев һоридог.
Аймагай, уласай, зональна, бүхэроссин бага футболоор мүрысөөнүүдтэ “Илалта” команда нэгэнтэ бэшэ илалта, үндэр амжалтануудые туйладаг. Тиихэдэ үхибүүд Великобритани, Хитад, Монгол гүрэнүүдэй уласхоорондын мүрысөөнүүдтэ хаба шадалаа туршаһан юм.
2013 ондо Хэжэнгэ аймагай “Илалта” гэһэн команда Сочи хотодо үнгэргэгдэһэн Бүхэроссиин урилдаанда илаһан юм. Удаань Лондон ошожо, “Арсенал” гэһэн командын гэшүүдтэй уулзажа, наадыень хаража, тэдэнэй хүмүүжэмэлнүүдтэй хамта футбол наадаһан юм гэжэ һануулнабди.
