895
Москва хотын Үндэһэтэнэй бодолгын болон можо хоорондын харилсаануудай департаментын түрүүлэгшэ Виталий Сучков Эсэгэ ороноо хамгаалгын Агууехэ дайнай ветерануудта хүрэбэ.
- Эсэгэ ороноо хамгаалгын Агууехэ дайнай ветерануудта хүрэжэ, тэдэнэй аша габьяа мартаагүйбди гэжэ доро дохин, баяраа мэдүүлхэ гээшэ нангин хэрэг. Москва хотын ажаһуугшад түүхэеэ мартаагүй. Москва шадар болоһон байлдаанай газарта Ород гүрэнэй можо нютагуудай арад зон сугларжа, шэрүүн байлдаанда ами наһаяа алдаһан сэрэгшэдэй дурасхаалынь мүнхэлжэ, хэмжээ ябуулгануудые үнгэргэдэг, - гэжэ Виталий Сучков хөөрэбэ.
Буряад Уласай Засагай газарай болон Москвагай түлөөлэгшэд Улаан-Үдэдэ ажаһуудаг Александра Семёновна Белова, Иннокентий Андреевич Княжев гэгшэдтэ хүрэжэ, дурасхаалай бэлэгүүдые бариһан байна.
Ярославска можоһоо гарбалтай Александра Белова, 1943 ондо, 13 наһатайдаа фабрикын-заводой һургуулида татагдажа, удаань Москвагай сэрэгэй тойрогто радиомонтёроор 1944 оной ноябриин 7 болотор үдэрэй 10-12 часай туршада хүдэлмэрилһэн юм. Александра Семёновна “За оборону Москвы” гэһэн медаляар шагнагданхай.
Иннокентий Андреевич Княжев 1941 оной октябрь һарада Ярууна аймагһаа дайнда ошожо, 97-дохи сибириин дивизиин бүридэлдэ дайлалдаһан юм. Иннокентий Княжев Москва шадар, Курск, Днепр шадар байлдаануудта, Белорусси, Украина булимтарагшадһаа сүлөөлгэдэ хабаадажа, Кенисберг хүрэтэр ошоһон байна. Дайнай үедэ тэрэ шархатаһан юм. “Улаан Тугай” , “Эсэгэ ороноо хамгаалгын Агууехэ дайнай 2-дохи шатын”орденуудаар, “За отвагу” гэһэн медаляар Иннокентий Андреевич шагнагданхай.
- Москвагай ажаһуугшад дайнай ветерануудта бэлэгүүдые, шагналнуудые барюулдаг һайхан заншалтай. Манай арад зон тэрэ һүрөөтэ жэлнүүдтэ гансашье Москва хото аршалаа бэшэ, харин бүхы гүрэнөө сүлөөлөө ха юм. Москва шадар байлдаанда хабаадаһан дайнай ветерануудта ниислэл хотын засаг зургаанай түлөөлэгшэдэй хүрэһэниинь, манай уласта удха шанартай юм, - гэжэ Буряад Уласай Толгойлогшын болон Засагай газарай захиргаанай үндэһэтэнэй хоорондын харилсаануудай болон эрхэтэдэй үүсхэл хүгжөөлгын хорооной түрүүлэгшэ Михаил Харитонов тэмдэглэбэ.
Буряад Уласта Эсэгэ ороноо хамгаалгын Агууехэ дайнай 10429 ветеранууд ажаһуудаг, тэдэнэй тоодо Москва шадар байлдаанда хабаадаһан 9 ветеранууд бии юм.
2016 ондо Москва, Санкт-Петербург хотонуудта Улаан-Үдын соёл, урлагай үдэрнүүдтэ Буряад Уласай түлөөлэгшэд Москва можын Подольск хото шадар оршодог “Кузовлево” гэһэн сэрэгэй алдарай хүшөөдэ хүрэжэ, Москва шадар байлдаанда ами наһаяа алдаһан нютагаархидайнгаа дурасхаалынь мүнхэлһэн байна гэжэ һануулнабди..
Буряад Уласай Засагай газарай мэдээсэлэй албанһаа гэрэл зураг абтаба.
