​Элитэ шүлэгшын үбсүүндэ Алтан Гадаһан одон яларлай!

Монгол моридой 

                 дабшаһан замуудаар – 

Дурна, Үрнэ зүг хүрэтэр,

             Хатан гол, Балкан хүрэтэр – 

Хаха зуран гаралайб. 

Огторгой харбаһан байшангуудай 

Одо мүшэтэ галнууд

Буурал сагай хүшэгэ һэхээд, 

Богдо Чингисэй бүргэд нюдэнүүд 

Харгыем гиигүүлэн,

Хойноһоом шэртэлэйл.

(Минии оршуулга. – Н.Б.)

Иигэжэ Буряадай арадай яруу найрагша Баир Дугаров нэгэ шүлэг соогоо бэшэһэн байдаг. Хүхэ Монголые нэгэдүүлэн, ниитэ улас түрэ байгуулагша Эзэн Богдо Чингис хаан манай зохёолшоной хойноһоо мүрдэн, дэмы шэртээ бэшэл ха. Ушарынь, Еврази түбиин нүүдэлэй тала газарнуудые магтан түүрээгшэ шүлэгшымнай дала наһанай дабаан дээрэ гараад байтар, Монголой Юрэнхылэгшэ Цахиагийн Элбэгдоржын гар табилгатай Зарлигаар олгогдоһон Алтан Гадаһан одон тэрэнэй үбсүүндэ яларлайл даа! 

Буряадай арадай яруу найрагша, хэлэ бэшэгэй эрдэмэй доктор Баир Дугаровта аха дүү ороной хүндэтэ шагнал гардаха ёһолол Улаан-Үдэдэхи Монголой Юрэнхы консулой яаманда һаяхана боложо үнгэрбэ. Монголой Юрэнхы консул Дамдин Чадраабал яруу найрагшын үбсүүндэ хүндэтэ одо хадажа ерээд, Монголой болон Ород ороной, Монголой болон Буряад ороной хоорондохи харилсаа холбоо үргэдхэхэ, бүмбэрсэг дэлхэй дээрэ монгол соёлой үндэр дээдын нэрэ соло батадхаха талаар буряад-монгол шүлэгшын гаргаһан алдар габьяа онсо тэмдэглэбэ. 

Үшөө һануулхаар юумэн гэбэл, Баир Сономович Монголой яруу найрагшадай шүлэгүүдые ородто сэхэ монголһоо ялас гэмээр олон удаа оршуулһан, монгол туургата арадуудай аман зохёолой үбэ баялиг хүршэ ороной дэбисхэр дээрэ суглуулан шудалха зорилготой эрдэмэй аян жэнгүүдтэ нэгэтэ бэшэ хабаадаһан габьяатай.

Баир Дугаров, юрэнхы консул Дамдин Чадраабал

Аркадий Батомункуевай гэрэл зурагууд