2017 оной июлиин 9-13-най үдэрнүүдтэ Улаан-Үдын Түбэй стадион дээрэ номо һуршаар “Байгалай годлинууд” гэһэн Бүхэроссиин мүрысөөн үнгэргэгдэбэ.
“Байгалай годлинуудта” Ородой Холбоото Уласай 15 можо нютагуудай 237 тамиршад болон Монголой суглуулагдамал команда хаба шадалаа туршабад.
Хубиин мүрысөөнүүдтэ классическа түхэлэй номо һуршаар эрэшүүлэй дунда түрүү һуури Үбэр Байгалай Болот Цыбжитов, 2-дохи һуури Буряад Уласай Цырен Балтаков, 3-дахи һуури Үбэр Байгалай Арсалан Балданов гэгшэд эзэлбэ. Эхэнэрнүүдэй дунда Виктория Будаева (Буряад Улас), Наталья Эрдыниева (Буряад Улас), Ханда Жамьянова (Үбэр Байгалай хизаар) гурбан түрүүлбэ.
Цырен Балтаков мүрысөөнэй үедэ.
Наталья Эрдыниева.
Блочно номо һуршаар эрэшүүлэй дунда Виктор Калашников (Ямало-Ненецкэ автономно тойрог), Константин Каплунов (Красноярска хизаар), Асим Павлов (Саха Яхад улас) гэгшэд шалгарба. Эхэнэрнүүдэй дунда Дарья Комардина (Кемерово можо), Оюна Болотова (Буряад Улас), Елена Михайлова (Красноярска хизаар) түрүү гурбан һууринуудые эзэлбэ.
Оюна Болотова.
Классическа түхэлэй номо һуршаар командануудай мүрысөөндэ эрэшүүлэй дунда Үбэр Байгалай хизаарай түлөөлэгшэд болон Улаан-Үдын олимпиин халаан бэлдэдэг хүүгэдэй болон эдиршүүлэй тамирай тусхай һургуулиин эхэнэрнүүд илаба. Блочно номо һуршаар Үбэр Байгалай хизаарай эрэшүүл түрүүлбэ. Эхэнэрнүүдэй дунда ЦСКА-гай тамирай клубай түлөөлэгшэд түрүү һуури эзэлбэ.
Борис Балдановай гэрэл зурагууд.