924
Июлиин 18-да Турциин Сансун хотын “Теккеёе” стадиондо Сурдлимпиин XXIII-дахи наадануудай нээлгын баяр ёһолол үнгэргэгдэхэ.
Энэ наадануудта 97 гүрэнүүдэй 3 мянганһаа дээшэ тамиршад хабаадаха. Ородой Холбоото Уласай суглуулагдамал командын бүридэлдэ барилдаашан Александр Цоктоев, сагаалса буудалгаар спортын мастернууд Цыпилма Намдакова болон Анатолий Гаськов гэгшэд Буряад Уласаа түлөөлхэ.
“Ородой Холбоото Уласай суглуулагдамал командада 47 можо нютагуудай 334 тамиршад ороһон байна. Тэдэнэй тоодо манай 3 тамиршад. Цыпилма Намдакова Анатолий Гаськов хоёр түрүүшынхиеэ энэ наадануудта хабаадана, харин Сурдлимпиин наадануудай чемпион Александр Цоктоевые амжалта туйлаха гэжэ хүлеэнэбди”, - гэжэ Бүхэросиин дүлии хүнүүдэй ниигэмэй Буряадтахи таһагай түрүүлэгшэ Екатерина Тумурова хэлэбэ.
Июлиин 19-дэ Алексей Гаськов, июлиин 25-да Цыпилма Намдакова гэгшэд Ородой Холбоото Уласай сагаалса буудалгаар чемпион, һоригшо Татьяна Енисеевагай хүмүүжэмэлнүүд эдэ наадануудта мүрысэхэ юм. Белгород хотодо үнгэргэгдэһэн Ородой Холбоото Уласай чемпионадта амжалтатайгаар хабаадаһанай удаа эдэ тамиршад суглуулагдамал командын бүридэлдэ ороһон байна. Тиихэдэ 18 можо нютагуудай түлөөлэгшэд хаба шадалаа туршаһан юм.
Июлиин 23-25-най үдэрнүүдтэ Ородой Холбоото Уласай сүлөөтэ барилдаагаар спортын габьяата мастер, Европын, дэлхэйн чемпион Александр Цоктоев мүрысэхэ. Тэрэнэй һоригшо Ородой Холбоото Уласай габьяата һоригшо Сырен-Доржо Андренов юм.
Буряад Уласай 5 тамиршад эдэ наадануудта бэлэдхэл гараһан байна. Харин Сурдлимпиин наадануудай хорооной шиидхэбэреэр Александр Цоктоев, Цыпилма Намдакова, Анатолий Гаськов гэгшэд шэлэгдэһэн байна. Сүлөөтэ барилдаашад Александр Трескин, Бальжинима Раднаев гэгшэд суглуулагдамал командын бүридэлдэ оробогүй.
Гэрэл зураг дээрэ Анатолий Гаськов.
Анатолий Гаськовой хубиин гэрэл зурагууд.
