885
Июлиин 22-то Буряад Уласай Кабанск аймагай Кабанск тосхондо “Нэгэдэл” гэһэн хасагуудай соёлой уласай IX-дэхи фестивалиин нээлгын баяр ёһолол эмхидхэгдэхэ.
2017 оной июлиин 21-23-най үдэрнүүдтэ үнгэргэгдэхэ фестивалиин хэмжээндэ хүүгэдэй сэрэгэй-тамирай “Сполох-2017” гэһэн бүхэросиин нааданай шата үнгэргэгдэхэ. Найр нааданай хэмжээ ябуулгануудта Буряад Уласай 19 аймагуудай болон Улаан-Үдын, Эрхүү можын, Приморско болон Үбэр Байгалай хизаарнуудай түлөөлэгшэд хабаадаха.
Хасагуудай өөрын онсо шанартай соёл, ажабайдал, ёһо заншал һэргээхэ, хасагуудай мори урилдаан болон дайшалхы мүрысөөнүүдые хүгжөөхэ, Ородой Холбоото Уласай, Буряад Уласай хасагуудай ниигэмүүдэй хоорондохи харилсаа бэхижүүлэн, зохёохы ажалай дүй дүршэлөөр андалдаха гэхэ мэтэ зорилгонууд бэелүүлэгдэхэ гэжэ фестиваль эмхидхэгшэд хэлэнэ.
Фестивалиин үедэ зохёохы, уран һайханай һалбаринуудта хасагууд бэлиг шадабарияа харуулха. Тиихэдэ заншалта ёһоороо хасагуудай өөрсэ маягтай мори урилдаан, ябаган хасагуудай мүрысөөн болон хүүгэдэй сэрэгэй-тамирай “Сполох-2017” гэһэн бүхэроссиин нааданай уласай шата эмхидхэгдэхэ. Уласай шатада илагшад Анапа хотодо үнгэргэгдэхэ бүхэроссиин нааданай түгэсхэлэй шатада хабаадаха юм.
Энэ хэмжээ ябуулгада мянгаад хүнүүд хабаадахаар хараалагдана. Нёдондо хасагуудай соёлой фестиваль Улаан-Үдэдэ эмхидхэгдэһэн байна.
Анна Огороднигой гэрэл зураг.
