Түби дэлхэйн түрүү гүрэнүүдые Түгнын эхин түлишөөр хангана. Жэлэй туршада аяар 11 сая тонно нүүрһэн малтагдана гэжэ Түгнын уурхайһаа мэдээсэнэ. Үдэр бүри 450 вагондо hайн шанартай шулуун нүүрһэн ашагдаад лэ, ябуулагдажа байдаг.
Үбэлэй саг байгаа. Шулуун нүүрһэнэй уурхайн дэргэдэ бодоһон Сагаан-Нуур hуурин хүрэбэб. Хүсөөтөөрхинэй урданай буусануудай байһан Олон-Шэбэртэ энэ hуурин гансата бодошоо бэлэй. Олон дабхар гэрнүүд жэрылдэн харагдана. Теэд хара тортогһоо боложо, саһанайшье биинь ойлгогдоногүй. Нэгэ хэды сагай үнгэрхэдэ, шэргэхэеэ байһан Сагаан нуурнай Хара нуур гэгдэдэг болохо аа гү?
Анхандаа хүбэн сагаан саһаар хушагдаад байдаг Олон-Шэбэрэй хүрьһэн урбуулан малтагдажа, хэдэн сая жэлнүүдтэ урданайнгаа хэбэртэ бусахагүйл даа. Айхабтар томо тогоон мэтээр үзэгдэдэг нүхэнүүдынь хэзээшье бүглэгдэхэ ааб? Түгнымнай талын нүхэнүүд халааһа хүлеэһэн шэнги харагданал. Талада бэлшээд төөришэһэн хэды олон үхэр мал эдэ нүхэнүүдтэнь орожо хосороо гээшэб? Хэн тоолохоб даа…
Энэ ехэ баялигһаа баярлахаар гү, али бархирхаар гү? Эхэ газарай хүрьһэн дороhоо хара алтанай нөөсын олзоборилогдодог болоходо, нютагай зон юу олооб? Үбшэ зоболон, архи тамхин, хэдэн олон хүнүүдэй һалаһан хуби заяан… Ажалтайшье болоһониинь үгы. Юундэ нютагай хүбүүд ажал бэдэржэ, хари гүрэнүүдээр тэнэhэн зандааб?
Нютагай үбгэд хүгшэдэй хэлэһээр, бүхы Түгнын дэбисхэр доро шулуун нүүрһэн нюугаатай. Тиимэһээ мэдээшьегүй байтарнай, Түгнын эхинһээ адаг хүрэтэр газар хуу урбуулагдашоод байжа болохо. Эды ехэ баялиг дээрэ ажаһуугаад, арай шамай ажамидаржа байһамнай гайхалтай.