​"Байгалай годлинууд" зэдэлээ

Үнгэрһэн долоон хоногто Буряад Уласай түбэй стадион дээрэ “Байгалай годлинууд” гэһэн бүхэроссиин томо мүрысөөн үнгэргэгдэбэ. Эндэ Ородой 13 можо нютагуудай тамиршадай хабаадахаяа ерэһэниинь һайшаалтай. 

Эмхидхэгшэдэй хэлэһээр, олон жэлэй хугасаа соо манай Улаан-Үдэдэ иимэ олон можо нютагууд тус мүрысөөндэ тамиршадаа эльгээгэгүй байгаа. Һур харбалгаар гүрэнэй һоригшо Эрдэм Жигжитовэй хэлэһээр, 2000-аад онуудаар иимэ эмхидхэхэ тухай дурадхал оруулагдаа.

- Тэрэ үедэ залуу һүрэгөө мүрысөөндэ хаража үзэхэ, мүн ехэшүүлнай ямар бэлэдхэлтэй байнаб гэһэн харалга тон хэрэгтэй болоод байгаа. Гэхэтэй хамта Буряад Уласаа аяншалгын талаар хүгжөөхэ гэһэн түсэб гараа. Тиигэжэ “Гэсэрэй годлинууд” гэһэн мүрысөө үнгэргэжэ эхилээбди. Удаань “Байгалай годлинууд” гэжэ нэрэтэй болоо, - гэжэ Эрдэм Жигжитов хөөрэнэ. 

“Байгалай годлинууд” hур харбалгаар Буряадай эгээл ехэ хэмжээнэй мүрысөөн болоно, бэрхээр харбагшад эндэ “Ородой спортын мастер” гэһэн нэрэ зэргэдэ хүртэхэ аргатай. 

Классическа түхэлэй номо һуршаар харбахадаа, Буряадай Цырен Балтаков финалда Үбэр Байгалай хизаарай Болот Цыбжитовтэ 2:6 гэһэн тоотойгоор шүүгдэһэн байна. Болот Буряадай гүрэнэй университедтэ һурадаг юм. 

Эхэнэрнүүдэй дунда алтан медаль абахын түлөө тулалдаанда Буряадай тамиршад уулзаа. Эндэ Виктория Будаева Наталья Эрдыниеваһаа булюу гэжэ тодороо. 

Блочно номо һуршаар харбалгада Оюна Болотова һүүлшын шатада Кемеровскэ можын Дарья Комардинаһаа нэгэ бага гээгдээ. Ямало-Ненецкэ автономито тойрогой түлөө олон жэлдэ харбадаг Буряадһаа уг гарбалтай Виктор Калашников илалта туйлаа. 

Командна тоосоондо Буряадай эхэнэрнүүд һайн дүн харуулаа. Финалда манай уласай хоёр команда ороо. Наталья Эрдыниева, Жибзема Дамбаева болон Анна Барадиева гэгшэд Виктория Будаева, Татьяна Бильтрикова болон Соёлма Сыренова гэгшэдэй командые шүүжэ, чемпионой нэрэ зэргэдэ хүртөө. Буряадай тамиршадһаа бүридэһэн үшөө гурбан команда шангай хоёрдохи һууринуудые эзэлээ. 

Бүхы дээрээ Буряадай тамиршад юһэн медаль абаһан байна. Үбэр Байгалай хизаарайхид найман медальтай гэртээ бусаа.