892
2017 оной июлиин 18-да Турциин Самсун хотодо Сурдлимпиин 13-дахи зунай наадануудай нээлгын баяр ёһолол үнгэргэгдэбэ.
Сурдлимпиин наадануудта 97 гүрэнүүдэй 3 мянганһаа дээшэ тамиршад хабаадана. Ородой Холбоото Уласай суглуулагдамал командада 227 тамиршад ороһон байна. 2013 оной Сурдлимпиин наадануудта греко-римскэ барилдаагаар чемпионой нэрэ зэргэдэ хүртэһэн Эдуард Ширазданов туг барижа, жагсаалда ябаба.
Июлиин 19-дэ сагаалса буудалгаар мүрысөөн үнгэргэгдэһэн байна. Ородой Холбоото Уласай 2016 оной чемпион, 2017 ондо мүнгэн медальда хүртэгшэ Буряад Уласай Анатолий Гаськов болон Белгородой можын Артем Козлов гэгшэд энэ мүрысөөндэ Ород гүрэнөө түлөөлбэ. Энэ урилдаанда 10 гүрэнүүдэй 16 мэргэн буудагшад хаба шадалаа туршаһан байна. Уридшалһан буудалгануудаар Анатолий Гаськов дүрбэдэхи һуури эзэлжэ, түгэсхэлэй шатада гансаараа Ородой Холбоото Улас түлөөлбэ. Түгэсхэлэй шатын мүрысөөндэ буудахадаа түрүүн 19, удаань 18,7 очконуудые абажа, тулалдаанһаа гараһан байна. Сурдлимпиин наадануудта мэргэн буудагшадай мүрысөөндэ тэрэ 7-дохи һуури эзэлбэ.
Ородой Холбоото Уласай сагаалса буудалгаар чемпион, һоригшо Татьяна Енисеевагай хүмүүжэмэл Цыпилма Намдакова июлиин 25-да сагаалса буудалгаар мүрысөөндэ хабаадаха. Июлиин 23-25-най үдэрнүүдтэ Ородой Холбоото Уласай сүлөөтэ барилдаагаар спортын габьяата мастер, Европын, дэлхэйн чемпион Александр Цоктоев мүрысэхэ. Тэрэнэй һоригшо Ородой Холбоото Уласай габьяата һоригшо Сырен-Доржо Андренов юм.
Гэрэл зураг дээрэ Анатолий Гаськов.
Анатолий Гаськовой хубиин гэрэл зурагууд.
