784
Улаан-Үдэдэ «Территория бизнеса - территория жизни» гэһэн Бүхэроссиин хуралдаан ажалаа эхилбэ.
Энэ хэмжээ ябуулгын үедэ мастер-классууд, үзэсхэлэнгүүд, сессинүүд үнгэргэгдэхэ юм. Тиихэдэ «ОПОРЫ РОССИИ» гэһэн эмхи зургаанай хүтэлбэрилэгшэ Александр Калинин болон мэргэжэлтэ шүүбэришэд олзын хэрэг эрхилэгшэдэй асуудалнуудта харюусаха юм. Буряад Уласай Толгойлогшын уялгануудые дүүргэгшэ Алексей Цыденов «Опора России» эмхиин бага болон дунда олзо эрхилэгшэдэй олониитын эмхи зургаанда Буряад Уласта энэ хуралдаа үнгэргэһэндэнь баяраа мэдүүлбэ.
«Буряад Уласай засаг зургаан олзын хэрэг эрхилэгшэдые дэмжэхэ, тэдэнэй ажалай урагшатай ябахын тула ёһорхонгүй, уряалгы зохид байхын түлөө оролдохо. Үнгэргэгдэжэ байһан хуралдаан энэ хэрэгтэ түрүүшын алхам болоно. Эндэ хабаадагшадта баярые хүргөөд, ажалаа ябуулхаар бэлэмди», - гэжэ Алексей Цыденов хэлэбэ.
Тиихэдэ, мүнөөдэр «Бизнес-Успех» гэһэн Үндэһэтэнэй шангай уласай шатын дүнгүүд согсологдохо. Мэргэжэлтэ шүүгшэд мэргэн, шуран олзын хэрэг эрхилэгшэдые элирүүлжэ, тэдэнэр түгэсхэлэй шатада гол шангай түлөө мүрысэхэ арга боломжодо хүртэхэ. «Сергей Выходцевэй нэрэмжэтэ номинаци» гү, али ондоогоор «Залуушуулай эрхим түсэл», «Эрхим интернет-түсэл», «Эрхим үйлэдбэриин түсэл» болон «Арадай олзын хэрэг эрхилэгшэ» гэһэн номинацинуудта эрхим олзын хэрэг эрхилэгшэд элирүүлэгдэхэ.
«Бизнес-Успех» гэһэн мүрысөө Буряад Уласта үнгэргэхэ дурадхал оруулһандатнай баяраа мэдүүлнэб. Хүнүүд олзын хэрэг эрхилхэдээ, амжалтай, урагшатайгаар ажалаа ябуулха хүсэлтэй байдаг. Буряад Уласта аяншалгын, эдеэ хоол үйлэдбэрилгын һалбаринуудта олзын хэрэг эрхилэлгын арга боломжонууд бии. Монгол, Хитад гүрэнүүдэй аяншалагшад ябана. Тиимээһээ Буряад Уласта ажаһуудаг зон түрэһэн нютагтаа олзын хэрэг эрхилхэ хүсэлтэй байһан байха», - гэжэ Опоры России» эмхиин хүтэлбэрилэгшэ Александр Калинин хэлэбэ.
Буряад Уласай Үйлэдбэриин болон худалдаа наймаанай сайдай уялгануудые дүүргэгшэ Алексей Мишенинэй хэлэһэнэй ёһоор, засаг зургаан болон олзын хэрэг эрхилэгшэдые нэгэдүүлхэ талаар энэ хуралдаан удха шанартай.
«Засагай газарай зүгһөө олзын хэрэг эрхилгэдэ миин анхарал хандуулагдана бэшэ, шиидхэгдээгүй асуудалнуудые, һанал болдолнуудые нэгэдүүлхэ зорилготой хуралдаан эмхидхэгдэнэ. Олзын хэрэг эрхилэгшэдэй дунда харилсаа хүгжөөлгэдэ нүлөөлхэ, туйлаһан амжалтануудаараашье хубаалдаха арга болоно ха юм. Буряад Уласта 27 мянган бага болон дунда олзын хэрэг эрхилэгшэд бүридхэлдэ абтанхай. Теэд энэ тоо хубилжал байдаг. Олзын хэрэг эрхилэгшэд амжалтатайгаар ябуулдаг ажал тухайгаа эндэ хөөрэхэ, харуулха. Тиимэ хүнүүд манай уласта олон. Мүнөө Үйлэдбэриин болон худалдаа наймаанай яаманда бага болон дунда эрхим 100 олзын хэрэг эрхилэгшэдые элирүүлхэ талаар ажал абуулагдана», - гэжэ Алексей Мишенин тэмдэглэбэ.
«Бизнес-Успех» мүрысөөндэ илаһан олзын хэрэг эрхилэгшэд федеральна хэмжээндэ гаража, хэжэ байһан ажал тухайгаа Ородой Холбоото Уласай нютаг можонуудта мэдээжэ болгохо аргатай. Тэдэнэр түлбэригүйгөөр олондо олзын хэрэг тухайгаа мэдүүлхэ болоно ха юм. Сколково гэһэн инновационно түбтэ һургуули гараха, Лондондо семинарта, үзэсхэлэнгүүдтэ хабаадаха аргатай болохо. Тиихэдэ тэдэнэр 3 жэлэй туршада банкнуудта үззүүлдэг туһаламжануудта түлбэригүй хүртэхэ», - гэжэ «Опора России» гэһэн эмхиин бага болон дунда олзын хэрэг эрхилэлгын бүхэроссиин олониитын эмхи зургаанай Буряадтахи таһагай түрүүлэгшэ Валентина Намсараева хэлэбэ.
Ородой Холбоото Уласта «Бизнес-Успех» гэһэн шан долоодохи жэлээ эмхидхэгдэнэ. «ОПОРЫ РОССИИ» эмхиин хүтэлбэрилэгшэ Александр Калининай хэлэһэнэй ёһоор: «Хүнүүдтэ олзын хэрэг эрхилэлгэдэ туһалнабди. «Бизнес-Успех» шанда хүртэгшэд гансашье Ород гүрэн дотор бэшэ , харин бүхы дэлхэйдэ мэдээжэ болоно. Тиимээһээ Ородой Холбоото Улас дотор эдэй засагай һалбарида хубилалтанууд болоно».
