754
Июлиин 21-дэ «Победа» авиакомпани Улаан-Үдэһөө Москва хүрэтэр самолёдой биледүүдые худалдажа эхилбэ.
Москва Улаан-Үдэ хоёрой хоорондо самолёдууд сентябриин 30-һаа долоон хоногой 3 удаа - гарагай гурба, таба, долооной үдэрнүүдтэ Улаан-Үдэһөө Москва хүрэтэр, гарагай хоёр, дүрбэ, долооной үдэрнүүдтэ Москваһаа Улаан-Үдэ хүрэтэр ниидэжэ эхилхэ юм.
- Эгээ үнэгүй биледэй сэн 999 түхэриг болоно. Тиихэдэ мянган билет 999 түхэригөөр, арба мянганһаа доошо бэшэ биледүүд 4999 түхэригтэ юм. Москва-Улаан-Үдэ гэһэн авиа замда иимэ сэн анхан байгаагүй, - гэжэ авакомпаниин хүдэлмэрилэгшэд хэлэнэ.
Ородой Холбоото Улас дотор үнэгүй сэнтэй биледүүдтэй «Победа» авиакомпаниин биледэй сэн бэшэ авиакомпанинуудтай жэшэхэдэ, 40%-тээр бага. Долоон хоногой 3 удаа хоёр ниислэл хотонуудай хоорондо Boeing 737-800 түхэлэй самолёдууд ниидэхэ юм. Москвагай Внуково аэропортдо Буряад Уласһаа хүрэһэн самолёдудай саг Бергамо, Кельн, Ларнаку, Меммиенген, Реус, Тиват, Сочи, Нальчик хотонуудта ошохо авиа замтай зохилдууланхай.
«Победа» компаниин сайтын мэдээгээр, октябриин 1-һээ биледэй сэн 4999 түхэриг болохо, энээндэ 199 түхэригэй даадхал нэмэгдэжэ, билет бүхыдөө 5198 түхэригтэ “Стандарт” тариф болохо юм. Уридшалһан мэдээгээр, “Стандарт” тарифай биледүүдэй тоо самолёдой 140 һууриин хорин хубинь байха. Бэшэ биледүүд 6098 түхэригэй “Плюс”, 9999 түхэригтэ “Премиум” гэһэнтарифуудта орохо. 5198 түхэригөөр ниидэхэ зоной олон байгаа һаань, эдэ биледүүд олон болгодохо гэжэ «Победа» авикомпаниин хүтэлбэрилэгшэд мэдүүлнэ.
Победа» авикомпани Буряад Улас Москва хотонуудай хоорондо ниидэхэ 2 самолёт худалдан абаһан байна. Энэ компанида Boeing 737-800 түхэлэй 2014-2015 онуудта үйлэдбэрилэгдэһэн 12 самолёдууд бии юм.
