2017 оной июлиин 18-23-най үдэрнүүдтэ Москва хотодо “Международный авиационно-космический салон” гэһэн дэлхэйн авиа хуралдаан үнгэргэгдэбэ. Энэ хуралдаанда “Ородой Холбоото Уласай” холдингдо ородог “Улаан-Үдын авиационно завод” гэһэн хуби ниилүүлһэн нээмэл бүлгэм түрүүшынхиеэ хабаадаба. Тэдэнэр өөдынгөө үйлэдбэриин 5 вертолёдуудые авиа хуралдаанда олондо харуулһан байна.
Ородой Холбоото Уласай сэрэгэй түлөөлэгшэд, Перу, Казахстан, Нигери, Хитад болон бусад гүрэнүүдэй 70-аад делегацинууд Ми-171Ш-ВН түхэлэй сэрэгэй-транспортын вертолёдоор ехэтэ һонирхобо.
“Ми-171Ш-ВН түхэлэй вертолёт үндэр хадатай, халуун уларилтай газарта ашаглагдадаг, бүхэ,шэрхи байһанһаа боложо, олоной һонирхол татаһан байна”, - гэжэ Улаан-Үдын авиазаводой мэдээсэлэй албанда тэмдгэлэбэ.
Олон шэглэлтэй арбан вертолёдуудые хари гүрэнүүдтэ дамжуулха тухай “Ородой Холбоото Уласай вертолёдууд” гэһэн холдинг United Helicopters International Group гэһэн бүлгэмтэй хэлсээ баталба. Тиихэдэ Улаан-Үдын авизаводто үйлэдбэрилэгдэһэн, Хитадта удаан сагай туршада үргэнөөр ашаглагдадаг, дүүрэн ашаа тээгээд, хүн зониие һуулгаад, урагша хойшонь зөөхэдэ, тааруу, түймэр сарагшад, гэмэлтэһэн гү, али төөриһэн зониие бэдэржэ олоод абарагшад, түргэн туһаламжа үзүүлдэг эмшэдэй хэрэглэдэг Ми-171 түхэлэй гурбан вертолёдуудые United Helicopters бүлгэм абаха болобо.
2018 ондо Ми-8АМТ түхэлэй үшөө 12 вертолёдуудые гүрэнэй транспортын лизингын компанинуудта дамжуулха тухай Улаан-Үдын авиазавод хэлсээ баталһан байна.
Тиихэдэ Улаан-Үдын авиазаводто үйлэдбэрилэгдэһэн Ми-171А2 түхэлэй хоёр вертолёдуудые туршажа, саашадаа тэрэниие түлбэритэ ашаглалгаар хэрэглэхэ тухай “ЮТэйр” гэһэн авиакомпанитай хэлсэгдэбэ.