843
Турциин Самсун хотодо үнгэргэгдэжэ байһан Сурдлимпиин наадануудта Буряад Уласай сүлөөтэ барилдаашан Александр Цоктоев хүрэл медальда хүртэбэ.
Сурдлимпиин наадануудта Александр Цоктоев 74 кг хүрэтэр шэгнүүртэ барилдаһан байна. Тэрэнтэй хамта 12 тамиршад энэл шэгнүүртэ тулалдаба. Түрүүшын тулалдаанда Буряадай тамиршан Туркмениин Сердар Муратгелдиевые булиба. Удаань Украинын Денис Фоминтой хаба шадалаа туршалсажа, илаһан байна. Һүүлээрнь Турциин Огуз Дондер гэгшые булижа, Александр Цоктоев мүрысөөндэ хабаадалгаяа үргэлжэлүүлбэ. Урагшатай барилдажа ябаһан Буряадай тамиршан удаадахи шатада Грузиин Шакро Чакветадзедэ диилдэбэ. Тиигэбэшье тэрэ амяа даража, 3-дахи һууриин түлөө Украинын Денис Фоминтой хибэс дээрэ дахин уулзажа, амжалта туйлаба.Тиигэжэ Александр Цоктоев Сурдлимпиин наадануудай хүрэл медальда хоёрдохиёо хүртэбэ. Тэрэнтэй хамта Монголой Батбаатар Ширэндэв 3-дахи һуури эзэлһэн байна.
Үнгэргэгдэжэ байһан Сурдлимпиин наадануудта Ородой Холбоото Уласай суглуулагдамал команда медальнуудай тоогоор түрүүлнэ. Найман үдэрэй туршада тэдэнэр 56 алтан, 38 мүнгэн, 29 хүрэл медальнуудыне абаһан байна.
Сурдлимпиин нааданууд июлиин 30-да түгэсэхэ.
Сурдлимпиин наадануудай сайтһаа гэрэл зураг абтаба.
