1042
Шэхэ хатуушуулай дунда Сурдлимпиин нааданууд эдэ үдэрнүүдтэ Турциин Самсун хотодо үнгэргэгдэнэ. Эндэ 97 гүрэнүүдэй 3000 гаран тамиршадай дунда Буряад Уласай гурбан тамиршад хабаадажа байна. Эдэ хэд бэ гэбэл, барилдаашан Александр Цоктоев, сагаалса буудагшад Анатолий Гаськов болон Цыпелма Намдакова гэгшэд болоно.
Шэхэ хатуушуулай дунда нааданууд аяар холын 1924 онһоо эмхидхэгдэнэ. Һая болотор Бүхэдэлхэйн шэхэ хатуушуулай нааданууд гээд нэрлэгдэдэг байгаа. 2000 онуудай эхеэр Сурдлимпиин нааданууд болгогдожо, Олимпиин болон Паралимпиин наадануудтай тон адли шухала мүрысөөн болонхой.
Эдэ жэлнүүдтэ Буряадай тамиршад яһала һайн дүнгүүдые харуулһан байна. Жэшээлбэл, барилдаашад Абидо Ринчинов, Егор Аюшеев болон Андрей Захряпин гэгшэд барилдаагаар дэлхэйн чемпионууд болоо бэлэй. Тиихэдэ Андрей Захряпин Бүхэдэлхэйн шэхэ хатуушуулай наадануудта гурба дахин илалта туйлаа. Удаань үшөө хоёр барилдааша хүбүүд Александр Цоктоев болон Григорий Кожевников гэгшэд Сурдлимпиин чемпионууд боложо тодороо. Тиихэдэ футболой бартаа хамгаалагша Александр Павлуцкий Сурдлимпиин нааданай мүнгэн медальда хүртөө юм.
Буряадаймнай буудагшад анха түрүүшынхиеэ иимэ ехэ хэмжээнэй мүрысөөндэ ошоод байна. Нааданай түрүүшын үдэр Анатолий Гаськов винтовкоор 10 метр зайда буудахадаа, 7-дохи һуури эзэлээ. Анатолий хадаа үшөө залуу тамиршан, ерээдүйдэ дүй дүршэлтэй болоод, Буряад ороноо суурхуулха байха. Үсэгэлдэр Александр Цоктоев хибэс дээрэ гараһан байна. Харин мүнөөдэр Цыпелма пистоледээр буудаха. Тэдэ ямаршье дүн харуулаа һаа, спортын түүхэдэ оробо гээшэ.
Самсун хотодо шэхэ хатуушуул спортын 21 зүйлөөр мүрысэнэ гээд тэмдэглэхэ шухала. Бүхы дээрээ 216 алтан медальнуудай түлөө тамиршад тэмсэнэ. Июлиин 24-нэй үдэшэ Ородой Холбооной суглуулагдамал команда 95 медаль абаад байгаа: 46-иинь алтан, 32-ынь мүнгэн, 17-иинь хүрэл.
Велосипедээр урилдаагаар, тамаралгаар, дзюдо барилдаагаар, сагаалса буудалгаар, греко-римскэ барилдаагаар, боулингаар, хүнгэн атлетикээр Ородой тамиршад түрүү һууринуудые эзэлһэн байна.
Манай хүршэ Монгол гүрэнэй тамиршад зургаан медальда хүртөө. Тэдэ медальнуудые дзюдогоор барилдаашад абаһан байна. Мүнгэн медальнуудта Даваням Баасандоржи болон Баатар Оюндэлгэрх гэгшэд хүртөө. Үшөө дүрбэн дзюдоистнууд шангай гурбадахи һууринуудые эзэлээ.
Сурдлимпиин нааданууд июлиин 30-да түгэсэхэ. Гол дүнгүүдтэйнь удаадахи дугаартаа танилсуулхабди.
Ехэ теннисээр мүрысөөнэй үедэ
Сурдлимпиин наадануудай сайтһаа зурагууд абтаа
Автор: Борис БАЛДАНОВ
