721
Зунай сэнгүү сагта үхибүүд лагерьнуудта амардаг ха юм даа. Илангаяа эдир тамиршадта энэ саг ехэ үрэ дүнтэй, туһатай байдаг. Буряадай ниислэл хотоһоо баруун урагшаа хорёод модоной зайда «Юнтур» гэһэн бэе элүүржүүлгын-тамирай лагерь оршодог юм. Зунай хоёрдохи халаанда тэндэ барилдаашад амаржа байна.
– Мүнөө бидэндэ барилдаагаар бэеэ һоридог 116 хүбүүд, басагад амарна. Эндэ унтаха, амарха зохид таһалганууд, бассейн бии. Алла Мухуевагай ударидалга доро ажалладаг тогоошодой бэлдэһэн амтатай эдеэ хоол хүүгэд үдэрэй таба дахин баридаг юм. Эдир барилдаашад һорилгоёо һарабшатай тусхай талмай дээрэ үдэрэй хоёр дахин үнгэргэдэг. Үдэшэ үглөөниинь заатагүй үглөөнэй һорилго хэжэ, холын зайда кросс гүйлдэдэг юм. Тэдэниие мэдээжэ тамиршад, спортын мастернууд Батор Цыренов, Баир Сыдеев, Вадим Бертунов болон Вадим Цыбиков гэгшэд һоридог. Иигэжэ сэбэр агаарта амарангаа, бэе тамираа һорижо байхадаа, ганса элүүржэнэ бэшэ, мүн элдэб һонин мэдэсэнүүдые абанабди, спортын ондоо зүйлнүүдтэй танилсанабди гэжэ үхибүүд хэлэдэг. Эдэнэй дунда Буряад Уласай, Ородой Холбооной болон СФО-гой чемпионууд, призернууд бии. Нэрлэбэл, Николай Мотошкин, Бавасан Буянтуев, Чингис Цыренжапов, Тумэн Бодиев болон бусад. Үдэшэндөө элдэб һонин уулзалганууд, хатарай, дуунай үдэшэнүүд үнгэргэгдэжэ, үхибүүд бэе бэетэеэ дүтөөр танилсана, – гэжэ «Юнтур» лагериие даагша Инна Анатольевна Морозова хөөрэнэ.
– Би Баяр Валерьевичай бүлэгтэй табадахияа эндэ амаржа байнаб. Сэбэр агаарта бэеэ һорижо байхада, ехэ гоё байна. Маанадтай һоригшод, аха заха хүбүүд дүй дүршэлөө хубаалдадаг, элдэб арга дүрэнүүдые заадаг. Намартаа СФО-гой мүрысөөндэ хабаадахабди, – гэжэ хотын 1-дэхи дунда һургуулиин шаби Артур Гладышев хөөрэнэ.
Һорилгын үедэ
Эдир барилдаашад
Авторай гэрэл зурагууд
Автор: Елена ДАМДИНОВА
