770
Ородой Холбоото Уласай Уһанай нөөсэнүүдэй федеральна агентствын хүтэлбэрилэгшын уялга саг зуура дүүргэгшэ Вадим Никаноров, Буряад Уласай Толгойлогшын уялгануудые дүүргэгшэ Алексей Цыденов гэгшэд Монголой Оршон байгаалиин болон аяншалгын яаманай гүрэнэй секретарь Цэгмид Цэнгэлтэй албанай хэрэгээр уулзаба.
Хүршэ гүрэнүүдэй түлөөлэгшэд уулзажа, Монгол гүрэниие зайн галаар хангаха арга боломжонууд тухай хэлсэбэ.
- Монгол гүрэнэй хүгжэлтэдэ Сэлэнгын эрьедэ ГЭС барилга шухала гэжэ ойлгонобди. Тиимэһээ Буряад Уласһаа зайн гал дамжуулха гэһэн дурадхал оруулнабди. Шэнээр зайн галай станци бариха гү, али зайн гал дамжуулха хэрэгсэл тодхохо талаар хэгдэхэ ажал адли. Харин зайн гал дамжуулгада мүнгэ һомололго һураггүй бага байха. Манай талаһаа зайн гал дамжуулха линиин барилгын ажалнуудые мүнгэ һомологшо эхилхээр бэлэн байна. Мүнөө дээрээ энэ хэрэгэй хоёр талада эдэ засагай һалбарида аша үрэтэй байхын тула бүхы тоололгонууд хэгдэхэ ёһотой. Тиихэдэ зайн гал дамжуулха талаар хуули эрхын уялгануудые үзэхэ шухала. Энэ асуудалаар хүршэ гүрэнүүдэй Засагай газарнууд хоорондоо харилсажа, зайн гал дамжуулха тухай хэлсээ баталхабди. Тус асуудал хаража үзэхыетнай дурадханаб, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ.
Ородой Холбоото Уласай Уһанай нөөсэнүүдэй федеральна агентствын хүтэлбэрилэгшын уялгануудые саг зуура дүүргэгшэ Вадим Никаноровой хэлэһээр, энэ асуудалаар Монгол гүрэнэй түлөөлэгшэдтэй үшөө хэлсэгдэхэ.
- Энэ асуудалаар үшөө хэлсэжэ, хүршэ гүрэнүүдэй оруулһан дурадхалнуудые Ородой Холбоото Уласай Засагай газарта элидхэхэбди, -гэжэ Вадим Никаноров тэмдэглэбэ.
Монголой Оршон байгаалиин болон аяншалгын яаманай гүрэнэй секретарь Цэгмид Цэнгэл Буряад Уласһаа Монгол гүрэндэ зайн гал дамжуулха гэһэн дурадхал хаража үзэхэ тухайгаа мэдүүлээ.
Буряад Уласай Засагай газарай мэдээсэлэй албанһаа гэрэл зураг абтаба.
