1003
Хуби ниилүүлһэн нээмэл “Бурятзолото” бүлгэмэй “Ирокинда” уурхай хурдан интернет холбоо хэрэглэхэ аргатай болобо. Таксимо-Ирокинда гэһэн 65 модо утатай хэһэг газарта хэлхеэ холбооной оптоволоконно утаһа татаха ажал энээнһээ урдахана дүүргэгдэжэ, иимэ арга боломжо бии болоо.
Тус утаһа татаха ажал хадаа “Бурятзолото” бүлгэмэй уурхайнууд дээрэ байра байдал эрид һайжаруулха талаар түсэлнүүдэй нэгэн болоно. Ажалшадайнгаа байра байдал һайжаруулха талаар шэглэлнүүдые шэлэжэ, элирхэйлхынгээ урда тээ хүдэлжэ байһан зонойнгоо һанамжа асуулга 2015 ондо бүлгэмэй хүтэлбэриин үнгэргэһэн тухайнь урид мэдээсэгдэһэн байгаа. Саг зуураар, һара һараар ээлжэлжэ хүдэлдэг ажаллагшад ажабайдалаа һайжаруулха бусад эрилтэнүүдэй тоодо интернет холбооной шанар һайжаруулга нэрлэһэн байха юм.
“Үндэр хада хабсагайнуудтай, намагтай газартай хадань энэ утаһанай бүхы замда тус ажал ябуулхань хэсүү байгаа. Тиигэбэшье, тогтоогдоһон болзортоо түсэлнай бэелүүлэгдээ. Хурдан интернет холбооной утаһа татаха ажал хамта дээрээ 3 һара хахад саг соо хэгдээ. Одоошье мүнөө манай ажалшад һайн шанартай холбоо хэрэглэжэ, түрэл гаралтаяа хурдан шуумгай харилсадаг болохонь”, - гэжэ “Ирокинда” уурхайн гүйсэдхэхы захирал Андрей Прилипин хэлэнэ.
Гэрэл болон дүрсэ дамжуулдаг бүдүүн утаһа зайн галай утаһантай зэргэлүүлэн татаха талаар барилгын ажалнууд хуби ниилүүлһэн “Читатехэнерго” бүлгэмэй хабаадалгатайгаар хэгдэһэн байха юм. Татагдаһан хэлхеэ холбооной энэ утаһаар Ирокинда тосхоной ажаһуугшад болон “Ирокинда” уурхайн хүдэлмэрилэгшэд секундын 100 Мбит хүрэтэр хурдан, шанар һайтай холбоотой болобо.
“Үйлэдбэриин ажалай бүхы ябаса хүтэлбэрилхэ талаар тодорхой гурим һайжаруулха болон холбооной шанар дээшэлүүлхэдэ энэ түсэлэй нилээн ехэ нүлөө үзүүлхэ байһаниинь дамжаггүй. Мэдээнүүдые дамжуулгын хурдан болоһые суг ажалладаг нүхэднай сэгнээд байна: бүлгэмэйнгээ өөрынь һужаа соо хүдэлхэдэ зохид болоо, дансануудые урагша хойшонь ябуулха ба бэшэгүүдые эльгээхэдэ түргэн болоо, SAP ERP һаалтагүйгөөр хүдэлдэг болоо”, - гээд хуби ниилүүлһэн нээмэл “Бурятзолото” бүлгэмэй мэдээсэлэй онол аргануудай таһагай дарга Андрей Сухоруков тэмдэглэнэ.
Уурхануудайнгаа ниигэмэй һалбариин хүгжэлтэдэ 2017 ондо “Бурятзолото” бүлгэм мүнгэ гаргашалха түсэбтэй. Тиин Зүүн Холбо тосхондо эдеэ хоол бариха шэнэ гэр, бэеэ һорихо спортын шэнэ байшангуудые, мүн тиихэдэ хүтэлбэрилхы зургаануудай болон ажалшадай байрладаг гэрнүүдые хоёр уурхайнуудтаа бариха хэрэгтэ 72 сая түхэриг бүлгэм һомолхо юм. Даб дээрээ саг зуураар, һара һараар ээлжэлжэ хүдэлдэг Холбын уурхайда үдэр бүри байһан ажаллагшадай тоо 700-гаад, Ирокиндын уурхайда – 600-гаад хүн.
«Бурятзолото» тухай тобшо мэдээн
Хуби ниилүүлһэн нээмэл “Бурятзолото” бүлгэм – газар дороһоо малтан гаргадаг “Холбын” болон “Ирокинда” гэһэн хоёр уурхайтай, Буряад Уластахи алта малтадаг эгээл томо хамжаан. “Ирокинда” уурхай Муяын аймагта, “Холбын” уурхай – Аха аймагта оршодог.
«Бурятзолото» болбол улас дотороо мүнгэн санда эгээл ехэ татабари оруулдаг болон хүн зондо ажал олгодог эмхинүүдэй нэгэн юм. Тус үйлэдбэридэ хоёр мянга гаран зон ажалладаг. 2016 ондо “Бурятзолото” 98 мянган унци алтанай тэнсүү зүйл (эквивалент) гаргаһан байна. 2008 онһоо хойшо хуби ниилүүлһэн нээмэл “Бурятзолото” бүлгэм Nordgold хамжаанай бүридэлдэ ородог.
Nordgold тухай тобшо мэдээн
Nordgold — 2007 ондо байгуулагдаһан алта малтан үйлэдбэрилдэг уласхоорондын хамжаан.
Бага гаргашануудтайгаар болон һайн шанартайгаар хүгжэхэ түсэлнүүдые бэелүүлхэ, амжалта түгэс ажал эмхидхэхэ талаар Nordgold горитой ехэ дүй дүршэлтэй юм. Өөрынгөө хуби ниилүүлэгшэдтэ сэн байгуулгада анхаралаа элсүүлжэ хүдэлхэдөө, үйлэдбэриингээ ябасын аюулгүйе эгээл үндэр хэмжээндэ сахижа, дүнгүүдыень дээдын шанартай болгохо арга боломжо хангадаг хамжаан гээшэ. Тиихэдээ Nordgold мүнгэнэй тогтууритай ябасые зүбөөр хэрэглэн, үшөө ехэ үрэ дүн үгэхөөр хүгжэлтын түсэлнүүдтэ тэрэниие шэглүүлжэ, тэрэ үедөө хүрэнгэ оруулагшадтаа мүнгыень бусааха арга боломжотой болоно бшуу.
2016 ондо Nordgold 869 мянган унци алтанай тэнсүү зүйл (эквивалент) үйлэдбэрилһэн байна.
Ажаллажа байгаа үмсын юһэн уурхайтай хамжаан болоно (дүрбэниинь Ородой Холбоото Уласта, гурбаниинь Буркина-Фасодо, Гвинейдэ болон Казахстанда – нэгэ нэгэн). Мүн тиихэдэ Nordgold баригдажа байгаа нэгэ түсэлтэй (Ородой Холбоото Уластахи “Гросс”), амжалтатай хүгжэхөөр, дүүргэгдэхээр болоһон хэдэн түсэлнүүдтэй, Буркина-Фасодо, Ородой Холбоото Уласта, Француз Гвианада болон Канадада ашагта малтамал бэдэрхэ түсэлнүүдтэй ба зүбшөөлэй олон үнэмшэлгэнүүдтэй юм. Nordgold хамжаанда ажаллагшадай тоо 8 000 хүнһөө үлүү гарадаг.
