​Борис Будаевай шангуудта хүртэбэ

Буряадаймнай эгээл суутай барилдаашан Борис Будаев түрэһөөр 60 жэлэйнгээ ойн баярые угтаба. Энээнтэй дашарамдуулан, июлиин 27-до бүхэ барилдаагаар уласхоорондын мүрысөөн Улаан-Үдэдэ эмхидхэгдэбэ. Борис Будаевай шанда хүртэхын түлөө энэ хэмжээ ябуулга 25-дахияа үнгэргэгдэбэ гээшэ. Буряад ороной залуу тамиршад юһэн медальда хүртэжэ, эмхидхэгшэдые, олон тоото харагшадые баясуулба. 

Мүнөө жэлэй мүрысөөндэ Казахстанай, Монголой, Хитадай, Урда Солонгосой болон Ород гүрэнэй 12 можо хизаарнуудай 112 тамиршад хабаадаба . Тиихэдэ Борис Будаевые амаршалхаяа барилдаагаар уласхоорондын нэгэдэлэй түлөөлэгшэд ерээ. Урда Солонгосой Ким Ик Джон, Ородой барилдаанай федерациин зүгһөө Наталья Ярыгина амаршалгын үгэнүүдые хэлээ. Энэ үдэр «Ажалай габьяа» гэһэн орденой медаль, Улаан-Үдэ хотын захиргаанай Хүндэлэлэй тэмдэг болон грамота, баярай бэшэгүүд Борис Будаевта барюулагдаһан байна. 

Ородой Холбооной залуушуулай суглуулагдамал командын бүридэлдэ ородог тамиршад мүрысөөндэ хабаадаа. Гүрэнэй һоригшо Юрий Сандаковай хэлэһээр, тэдэ дэлхэйн чемпионадта бэлдэжэ байна. Иимэ шанга тулалдаануудай урда тэдэ заал һаа хибэс дээрэ гараха ёһотой. Борис Будаевай мүрысөөн энээндэ эгээл тааруу байжа, тэдэ Улаан-Үдэ ерээ бшуу. 

Кабардино-Балкариин барилдаашан Азамат Закуев, Дагестанай бүхэшүүл Магомедамин Дибиров ба Разамбек Жамалов, Красноярска хизаарай Усман Шахгиреев болон Ставропольско хизаарай Рустам Магомедов гэгшэд өөр өөрынгөө шэгнүүрнүүдтэ алтан медальнуудта хүртэжэ, 20 наһа гүйсөөдүй Ородой тамиршадай дунда түрүүшүүлэй тоодо дэмы ороногүйбди гэжэ гэршэлээ. 

Үлэһэн гурбан алтан медальнуудта Буряадаймнай тамиршад хүртэбэ. Базар Батоболотов, Андрей Гатаулин болон Юрий Власко гэгшэд чемпионуудай нэрэ зэргэдэ хүртөө. 

Мүрысөөнэй һүүлээр Байгал далайн эрье дээрэ амаржа байха үедөө Юрий Власко хутагаар хадхуулжа, наһа бараба. 

Агаһаа уг гарбалтай Базар Батоболотов 50 килограмм хүрэтэр шэгнүүртэнэй финальна уулзалгада нютагайнгаа хүбүү Барас Шоймполовые шүүжэ, чемпион боложо гараа. 

55 килограмм хүрэтэр шэгнүүртэ Андрей Гатаулин һонин барилдаа харуулжа, бүхы дүрбэн уулзалгануудтаа ялас гэмэ амжалтануудые туйлаа. Тиигэжэ финалда тэрээнтэй уулзаһан Алдар Мункуев юушье хэжэ шадабагүй. Андрей Гатаулин мүрысөөнэй «Эрхим барилдаашан» гэһэн нэрэ зэргэдэ хүртөө. 

Буряад барилдаашадай дундаһаа Буян Цыренов, Эрдэм Цыренжапов болон Андрей Елбаскин гэгшэд шангай хоёрдохи һууринуудые эзэлээ. Зорикто Булдаев болон Очир Доржиев гэгшэд хүрэл медальнуудта хүртөө. 

Энэ мүрысөөнэй һүүлээр Буряад ороной барилдаашад нэгэ бага амараад, 2018 оной мүрысөөнүүдтэ бэлдэжэ эхилхэнь.

Шанга тулалдаанууд болоо

Шагналгын үедэ

Анна Огороднигой гэрэл зурагууд