859
Түмэр харгын хүдэлмэрилэгшэдэй үдэртэ дашарамдуулан, Мысовая станцида шэнэ вокзал нээгдэбэ.
Тэрэнэй нээлгын баяр ёһололдо Зүүн Сибириин түмэр харгын дарга Василий Фролов, Буряад Уласай Толгойлогшын уялгануудые дүүргэгшэ Алексей Цыденов, Кабанск аймагай захиргаанай түлөөлэгшэд хабаадаһан байна. 1100 дүрбэлжэн метр талмайтай, хоёр дабхар шэнэ байшанда 100-аад хүн нэгэ дороо багтаха аргатай юм.
- Хуби ниилүүлһэн нээмэл “РЖД” бүлгэм хүнүүдэй түмэр харгыда ябахада, һайн шанартай туһаламжа тэдэнэртэ хүргэхэ гэжэ оролдодог, - гэжэ Василий Фролов тэмдэглэбэ.
Шэнэ вокзалда биледүүдые худалдаха касса, үхибүүдтэй хүнүүдтэ амарха таһалга, эмнэлгын пункт гэхэ мэтэ, харгыда ябагшадай амарха таатай оршон түхеэрэгдээ. Тиихэдэ эрэмдэг бэетэй зоной һаадгүй ябаха наалгай харгынууд, халуун эдеэ бариха газарта тэдэнэй тэргэнүүдэй үндэртэ тааруулагдаһан столнууд бии. Нюдэнэй хараа муутай, хатуу шэхэтэй хүнүүдтэ мэдээсэл дуулгаха үгэхэ тусхай аппаратура тодхогдонхой.
- Түмэр харгын үйлэдбэридэ Буряад Уласай арба мянганһаа дээшэ хүн ажалладаг. Тиихэдэ зүүн Сибириин түмэр харгы уласай бюджедтэ эгээл ехэ татабари түлэгшэдэй нэгэн болоно. Түмэр харгын һалбариин хүгжэхэдэ, хүн зоншье олоор ябана ха юм, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ.
Мысовая станцида вокзал барилгада хуби ниилүүлһэн нээмэл «РЖД» бүлгэм 204 млн. түхэригһөө дээшэ мүнгэ гаргашалаа.
Буряад Уласай Засагай газарһаа гэрэд зураг абтаба.
