Хэжэнгын «Илалта» команда Сибириин федеральна тойрогто чемпионой нэрэ зэргэдэ хүртэжэ, уласхоорондын «Артек» гэһэн хүүгэдэй түбтэ сентябриин 25-һаа октябриин 15 болотор бага футболоор мүрысөөнүүдтэ хабаадаха юм.
Майн 13-да «Ближе к звёздам» гэһэн Бүхэроссиин тамирай бага мүрысөөнүүдэй уласай шата эхилһэн байна. Энэ мүрысөөндэ уласай 6 команда хаба шадалаа туршалсаа. Тэдэнэй тоодо Хэжэнгэ аймагай «Илалта» команда мүрысэжэ, уласай шатада илаһан байна. Тиигэжэ тэдэнэр Сибириин федеральна тойрогто уласаа түлөөлхэ эрхэдэ хүртөө һэн.
Июниин 23-һаа 30 болотор Алтай хизаарай Барнаул хотодо үнгэргэгдэһэн тойрогой мүрысөөндэ, Алтай, Красноярска хизаарнуудай, Новосибирск можын болон Буряад Уласай хамта 4 команданууд урилдаһан байна. Тойрогой шатын мүрысөөндэ «Илалта» команда бүхы уулзалгануудта илажа, түрүүлээ һэн. Хэжэнгын хүбүүд Сибириин федеральна тойрогто чемпионууд боложо, уласхоорондын «Артек» гэһэн хүүгэдэй түбтэ сентябриин 25-һаа октябриин 15 болотор мүрысөөнүүдтэ хабаадаха юм.
«Илалта» командын хүбүүд аймагай, уласай, тойрогой, бүхэроссиин бага футболоор мүрысөөнүүдтэ нэгэнтэ бэшэ үндэр амжалтануудые туйлаһан байна. Тэдэнэр Великобритани, Хитад, Монгол гүрэнүүдтэ урилдаануудта баһал хабаадаһан юм. 2013 ондо Сочи хотодо «Ерээдүй шамһаа дулдыдана» гэһэн бага футболой чемпионадта илажа, Лондон хотоор аяншалха, «Арсенал» клубтай танилсаха эрхэдэ хүртэһэн байна гэдэ һануулнабди. Тэрэ аяншалгын үедэ буряад тамиршад мэдээжэ клубай академиин хүмүүжэмэлнүүдээр бага футбол наадаһан юм.