​Байгалай эрьедэ бэеэ һорино

Байгал далайн эрьедэ оршодог «Энхэлэг» гэһэн элүүржүүлгын-спортивна лагерьта мүнөө жэлэй түрүүшын хоёр халаанда 400 гаран хүбүүд, басагад бэе тамираа һайжаруулаа. Эдэ үдэрнүүдтэ эндэ барилдадаг үхибүүд ерэнхэй. Уласай олимпийскэ халаанай һургуулиин захирал Цырен Цындыжаповай хэлэһээр, тус лагерьта спортын элдэб зүйлнүүдээр бэеэ һоридог үхибүүд лагерьта ерэнэ.

- Мүнөө жэлдэ манай 38 шабинар эдиршүүлэй дунда Ородой суглуулагдамал командын гэшүүд болоо. 2016 оной дүнгөөр манай эмхи зургаан Ородой эрхим һургуулинуудай тоодо оролсонхой. Тамиршан жэлэй хугасаада 46 долоон хоног хүдэлдэг ааб даа. Үлэһэн гурбан недели амарха хэрэгтэй юм гэжэ һайн ойлгожо байнабди, - гэжэ омогорхон Цырен Цындыжапов хөөрэнэ. 

Амаралта дээдэ хэмжээндэ эмхидхэхын тула спортын һургуулиинхид хүүгэдэй унтадаг болон һорилгын байшануудые заһабарилна. Жэл бүри дүй дүршэлтэй тогоошод үхибүүдые амтатай эдеэ хоолоор хангадаг юм.

- Түрүүшын халаанда 200 гаран тхэквондистнууд амараа. Хоёрдохи халаанда боксоор, фитнесс аэробикоор, һур харбалгаар, теннисээр бэеэ һоридог үхибүүд «Энхэлэг» ерээ, - гэжэ лагериин захирал Базар Дашеевич Цыренов хөөрэнэ. 

Спортын лагерь һэн тула үглөөнэй хоол бариһанай удаа үхибүүд заабол бэеэ һоридог. Эдир тамиршад Байгал далайн эрьеэр гүйлдэжэ, һорилгоёо эхилдэг. Бэшүүр аймагай Бага Хунилай һууринай гурбадахи классай һурагша Александр Фурмановай хэлэһээр, тэдэ үдэртөө боксоор гурба дахин һорилго хэдэг байгаа. 

- Һаяхан манай лагерьта боксоор мүрысөөн болоо. Өөрынгөө наһанай бүлэгтэ би илалта туйлааб. Дүрбэн жэлэй туршада аяар 8 медальда хүртөөб, - гэжэ багахан тамиршан баяраа мэдүүлнэ. – Эндэ амархада гоё байна. Олон нүхэдтэй болооб. 

Тус лагерьта амарһан, бэеэ һориһон хүүгэд спортоор һайн дүн харуулдаг. Хоёрдохи халаанда амарһан һур харбагша Санжай Халудоров Һурагшадай бүхэроссиин спартакиадада ошоод, шангай хоёрдохи һуури эзэлһэн байна. Энэ хадаа тус тамиршанай эгээл ехэ амжалта болоно. 

Байгалай сэбэр агаарта амархаяа, бэеэ һорихоёо лагерьта Ород гүрэнэй бусад можо нютагуудай үхибүүд ерэдэг заншалтай. Мүнөө жэлдэ Томскын, Амурай, Эрхүүгэй, Архангельска можонуудай, Үбэр Байгалай хизаарай үхибүүд эндэ амарһан байна. Архангельска можын Северодвинск хотын һур харбагшад гурбадахи жэлээ Байгал ерэнэ. Энэ хотын долоодохи классай һурагша Лев Курбан иигэжэ хөөрэбэ:

- Байгал далай бии юм гэжэ үнинэй мэдэдэг һэмби. Энээн тухай олон номууд соо һонирхожо уншаһан байнаб. Харин өөрынгөө нюдөөр домог суута далайе анха түрүүшынхиеэ харааб. Байгалай уһанда хэдэн дахин орооб. Манай тэндэхидэ орходоо дулаан байна. Үшөө тиихэдэ эндэ һорилго хэжэ, дүнгүүдээ дээшэлүүлхэ һанаатайб. Эндэ олон тоото һонирхолтой хэмжээ ябуулганууд үнгэргэгдэнэ. «Бизнесменэй нэгэ үдэр» болон КВН наадан ехэ һонин байгаа. 

Үхибүүдтэй тусхай бэлэдхэл гараһан вожатанууд болон хүмүүжүүлэгшэд хүдэлнэ. Тэдэ үхибүүдые һонирхуулха, элдэб юумэндэ һургаха гэжэ оролдоно. Тиимэһээ лагерьта элдэб хэмжээ ябуулганууд үдэр бүри эмхидхэгдэжэ байдаг. 

Буряадай гүрэнэй ехэ һургуулиин медицинскэ факультедэй 4-дэхи курсын Дарья Шохонова энэ лагерьта вожатаар амжалтатайгаар хүдэлнэ.

- Үшөө һургуулиин һурагша ябахадаа, гурба дахин «Рассвет» гэһэн лагерьта амарһан байнаб. Нэгэ дахин вожатануудые бэлдэдэг бүлэгтэ ороо һэм. Удаань «Океан» гэһэн бүхэроссиин түбтэ баһал вожатануудые бэлдэдэг бүлэгтэ тудааб. Мүнөө оюутан болоод байхадаа, зунай амаралтын үедэ вожатаар хүдэлдэгби. Энэ жэлдэ тусхай һуралсал гараад, «Энхэлэг» ерээб, - гэжэ Дарья Шохонова хөөрэнэ. 

Буряадай гүрэнэй ехэ һургуулиин Зүүн зүгэй дээдэ һургуулиин 3-дахи курсын оюутан Гэсэр Галсанов бэрхэ вожата гэжэ тоологдодог. Мүнөө зун эмхидхэгдэһэн «Эрхим вожата» гэһэн уласай мүрысөөндэ шангай хоёрдохи һуури эзэлһэн байна. Вожатануудһаа гадна тус лагерьта спортивна инструкторнууд хүдэлдэг. Тэдэ спортын талаар олон хэмжээ ябуулгануудые үнгэргэнэ. Эдэнэй тоодо боксоор бэеэ һоридог Сергей Горда болон Радна Цыбиков гэгшэдые нэрлэмээр. 

- Би эндэ практика гаранаб. Үхибүүдтэй хүдэлхэ дүй дүршэл маанадта ехэ хэрэгтэй юм. Юуб гэхэдэ бидэ физкультурын багшанар болохобди, - гэжэ Радна Цыбиков хэлэнэ. 

Эдэ хоёр хүбүүд баганууд байхадаа, өөһэдөө энэ лагерьта амаржа, һорилго хэһэн юм. Оюутад ажалайнгаа хажуугаар һорилгоёо хэжэ үрдидэг юм. Эдэ үдэрнүүдтэ Радна Сербидэ үнгэргэгдэжэ байһан уласхоорондын мүрысөөндэ ошоо. Харин Сергей түрүүшынхиеэ ехэшүүлэй дунда тулалдаануудта хабаадаха. Тиимэһээ һайн бэлэдхэл хэрэгтэй.

Мүнөө жэлдэ Томскын, Амурай, Эрхүүгэй, Архангельска можонуудай, Үбэр Байгалай хизаарай үхибүүд эндэ амарһан байна

Борис Балдановай гэрэл зурагууд