​Дэлхэйн чемпионадта хабаадахань

Сентябриин 12-17-ой үдэрнүүдтэ Бээжэн хотодо үнгэргэгдэхэ эрэмдэг бэетэй һур харбагшадай дэлхэйн чемпионадта Буряадай табан тамиршад хабаадахань гэһэн мэдээсэл үнгэрһэн долоон хоногой үедэ соносхогдобо. 

Ородой суглуулагдамал команда hүүлшынгээ бэлэдхэл Байгал далай дээрэ үнгэргэхөөр хараална. 

- Дэлхэйн чемпионадта хабаадахын түлөө тамиршад шэлэн абалгын хэдэн мүрысөөнүүдтэ хабаадаһан байна. Улаан-Үдэдэ болоһон Ородой чемпионадай болон Раменское хотодо һая үнгэргэгдэһэн Ородой Кубогто хүртэхын түлөө мүрысөөнэй үедэ гол шэлэлгэ болоо гээд хэлэлтэй, - гэжэ Буряадай суглуулагдамал командын ахамад һоригшо Цыденбал Цыренжапов хөөрэнэ. 

Ородой Кубогто хүртэхын түлөө мүрысөөндэ Буряадай тамиршад хоёр алтан, гурбан мүнгэн болон хоёр хүрэл медальнуудые абаһан байна. Хубиин тоосоондо Бадма Хаминдаев кубогто хүртөө. Финалда тэрэ үшөө нэгэ Буряадай тамиршан Баир Шигаевые илажа гараа. 

Командна микст тоосоондо алтан медаляар Бадма Хаминдаев Татьяна Андриевскаятай хамта шагнагдаа. Хубиин тоосоондо Татьяна Андриевская хоёрдохи һуури эзэлһэн байна. 

Буряадай суглуулагдамал команда баһа мүнгэн медаль абаа. Командын бүридэлдэ Бадма Хаминдаев, Баир Шигаев болон Александр Дорофеев гэгшэд харбаа. Ирина Баторова, Александр Дорофеев гэгшэд хубиин тоосоондо гурбадахи һууринуудые эзэлһэн байна. Үшөө тиихэдэ Ирина Баторова Сергей Хутаковтай хамта микст тоосоондо хүрэл медальда хүртөө. 

Тус мүрысөөнэй удаа Ородой суглуулагдамал команда бүридхэгдэбэ. Тиигэжэ Татьяна Андриевская, Бадма Хаминдаев, Александр Дорофеев, Ирина Баторова болон Сергей Хутаков гэгшэд Пекин ошохо эрхэдэ хүртөө. Августын 20-һоо сетябриин 6 болотор Ородой тамиршад Байгал далай дээрэ, Баргажан аймагай Максимиха һууринда, һорилго гараха юм. Сентябриин 6-да тэдэ Улаан-Үдэһөө сэхэ Пекин ниидэхэ байна.

Буряадай һур харбагшад

Виктория Аюржанаевагай гэрэл зурагууд