​Лупсановтанай үхибүүд шанганууд

Санаар урилдаанай мэдээжэ һоригшо Александр ЦыренДоржиевич Лупсановай гурбан үхибүүд ачери-биатлоноор бүхэроссиин мүрысөөнүүдтэ шалгаржа, гэртээ бусаба. 

Калужска можын Людиново хотодо ачери-биатлоноор Ород гүрэнэй зунай чемпионат үнгэргэгдөө. Хажуугаарнь Калужска можын нээмэл чемпионат болоһон байна. 

Аха дүү Баяр болон Зорикто Лупсановууд 7,5 километр зайда урилдаанда хоёрдохи болон гурбадахи һууринуудые эзэлээ. Эндэ Зорикто мүнгэн медальда хүртөө. Ой соогуур гүйжэ ерээд, номо һуршаар харбахадаа, тэрэ 6 дахин тудажа шадабагүй. Мүн Баяр 3 дахин hарюу харбаба. Тиигэбэшье хүрэл медальда хүртэжэ шадаа.

- Минии бага хүбүүн Зорикто үнинэй Ородой суглуулагдамал командын гэшүүн юм. Хэдэн жэлэй саада тээ спортын мастер боложо шадаа. Энэ мүрысөөндэ манай аха Баярай спортын мастерай норматив дүүргэhэндэнь баяртайб, - гэжэ Александр Цырен-Доржиевич хөөрэнэ.

Энэ мүрысөөнэй удаа Зорикто Лупсанов дахин Ородой суглуулагдамал командын бүридэлдэ оруулагдажа, сентябрь соо Нидерландын Гаага хотодо эмхидхэгдэхэ Европын Кубогто хабаадаха эрхэтэй болобо. 

Лупсановтанай үргэмэл басаган Юлия Угловская Калужска можын нээмэл мүрысөөндэ гурбадахи һуури эзэлһэн байна. Тэрэ эдиршүүлэй дунда хабадаа.

- Манай Юля басаган оройдоол 17 наһатай юм. Мүнөө дээрээ дүй дүршэлынь багашаг. Гэбэшье ехэшүүлэй дунда Ородой чемпионадта хабаадажа, 30 гаран тамиршадай дунда 12-дохи һуури эзэлжэ, маанадаа баярлуулба, - гэжэ Александр Лупсанов хөөрэнэ.