​Бүхэ барилдаанай мүрысөөнүүд: Ойхон аралһаа Агын тала хүрэтэр

Бүхэ барилдаагаар мүрысөөнүүд ганса манай Буряад Уласта эмхидхэгдэнэ бэшэ, мүн хүршэ Эрхүү можодо болон Үбэр Байгалай хизаарта үнгэргэгдэжэ, олон хүн зониие һонирхуулна. 

Һаяхан иимэ мүрысөөнүүд Ойхон аймагта ба Ага тойрогто үнгэргэгдэбэ.

Алханын шан 

Энэ заншалта болоһон мүрысөөн мүнөө жэлдэ 13-дахияа эмхидхэгдэнэ гээд хэлэлтэй. Түүхэ домогто Алханын хормойдо тус хэмжээ ябуулгада хабаадахаяа, харахаяа олон хүн сугларна. 

Мүрысөөндэ хабаадаһан 170 гаран тамиршад ехэшүүлэй дунда гурбан шэгнүүртэ хубааржа барилдаа. Тэдэнэй хажуугаар эдиршүүл өөһэд хоорондоо тулалдаануудта хабаадаа. 

Шулуутайн Буянто Жалсанов, Согто-Хангилай Арсалан Будожапов болон Догойн Батор Цыренжапов гэгшэд өөр өөрынгөө шэгнүүртэ шалгараа. Эндэ Захааминай бүхэ Ринчин Санжиев шангай хоёрдохи һуури эзэлээ. 

Мүрысөөнэй абаргын нэрэ зэргэдэ мэдээжэ барилдаашан Цыбик Максаров хүртөө. Тэрэ Догойн Зорикто Жамбаловые илаба. Һонирхолтойнь гэхэдэ, эдэ хоёр тамиршад жэлһээ жэлдэ һүүлшын шатада уулзана. 

Бүргэдэй хатар эрхимээр гүйсэдхэһэнэй түлөө шангуудта Баир Омоктуев болон Ага-Хангилай Болот Бадянов гэгшэд хүртөө. 

Хэжэнгэ аймагай тамиршан Аюша Аюшеев эдиршүүлэй дунда абсолютна чемпион болоһон байна. 

Үндэр баабай Ойхондо 

Эдэл үдэрнүүдтэ Байгал далайн эрьедэ Ойхоной аймагта бүхэ барилдаашад сугларжа, СССР-эй спортын мастер Михаил Елбаскинай дурасхаалда зорюулагдаhан мүрысөөндэ хабаадаа. 

Буряад барилдааша хүбүүдэй дундаhаа Ородой чемпионадта эгээл түрүүн нэгэдэхи һуури эзэлһэн Михаил Елбаскинай шангуудта хүртэхын түлөө мүрысөөн үшөө 1990-ээд онуудһаа эмхидхэгдэнэ. Хоёр жэлэй саада тээ наһа барахадань, тэрэнэй дурасхаалда зорюулагдаhан тулалдаануудые эмхидхэхэ гэһэн шиидхэбэри абтаа һэн. 

Эдиршүүлэй дунда тулалдаануудта Боохоной, Ойхоной, Эхирит- Булагадай, Эрхүү хотын болон Оһын барилдаашад түрүүлһэн байна. Боохон аймагай Константин Топшиноев абсолютна чемпионой нэрэ зэргэдэ хүртөө. 

Ехэшүүл дүрбэн шэгнүүртэ хубааржа барилдаа. 60 килограмм хүрэтэр шэгнүүртэ Эрхүү хотын Дмитрий Зунтоев түрүүлжэ гараа. Хурамхаанай бүхэ Алексей Раднаев 72 килограмм хүрэтэр шэгнүүртэ нэгэдэхи һуури эзэлээ. 84 килограмм хүрэтэр шэгнүүртэ Эрхүү хотын Юрий Иванов финалда Мухар-Шэбэр аймагай Денис Дондуковые шүүжэ гараа. 

Эгээл хүндэ шэгнүүртэй барилдаа шадай дунда Баргажанай Батор Цыренов нэгэдэхи һуурида гараа. Тус шэгнүүртэ хоёрдохи һуури эзэлһэн Оһо аймагай Алдар Хамаев абсолютна чемпион боложо тодороо.

Барилдаанай үедэ

Владимир Шираповай болон Ага тойрогой сайтһаа абтаһан зурагууд