Эрхүү хотодо 14-17- ной үдэрнүүдтэ Петербургын студиин кино буулгагшадай бүлэг Александр Вампиловай намтарта зорюулһан “Облепиховое лето” гэһэн киногой гол хубинуудай нэгэ хэһэг буулгаха.
Энэ кино байгша оной март һарада буулгагдажа эхилһэн юм. Буряад Уласай гарбалтай, мүнөө Москва хотодо ажаһуудаг Виктор Алфёров энэ киногой найруулагша юм. Александр Вампиловай рольдо мэдээжэ зүжэгшэн Андрей Мерзликин наадаха.
- Оюутан ябахадаа, тэрэнэй зүжэгүүдтэ наадагша һэм. Александр Вампилов аргагүй бэлигтэй хүн байгаа. Тэрэнэй зохёолнууд дотор инаг дуран, хүнүүдэй хоорондохи харилсаан, тэдэнэй хуби заяан тухай хэлэгдэдэг. Тиимэһээ эдэ зохёолнууд ямаршье сагта хүнүүдтэ ойлгосотой, дүтэ байха, - гэжэ Александр Мерзликин хэлэһэн байха юм.
2017 оной августын 19-дэ Александр Вампилов амиды мэндэ ябаа һаа, 80 наһанайнгаа ойн баяр тэмдэглэхэ һэн. Энэ ойдо дашарамдуулан, Эрхүү можодо баярай хэмжээ ябуулганууд үнгэргэгдэхэ юм. Тэдэнэй хэһэгүүд “Облепиховое лето” гэһэн кинодо оруулагдаха.
Александр Валентинович Вампилов 1937 оной августын 19-дэ түрэһэн юм. Тэрэ 3-дахи курсын оюутан ябахадаа, түрүүшынгээ “Персидская сирень” гэһэн рассказ бэшэжэ, тэрэнь 1957 ондо “Иркутский университет” сониндо хэблэгдэһэн байна. Удаадахи “Стечение обстоятельств” рассказ тэрэл сониндо 1958 оной апрелиин 4-дэ хэблэгдэжэ, удаань ном боложо гараһан юм. Александр Вампиловай “Прощание в июне” гэһэн пьесэ Литвагай Клайпеда хотын драмын театрта табигдажа, драматург олондо мэдээжэ болоһон байна. Тэрэнэй “Старший сын”, “Утиная охота”, “История с метранпажем” гэһэн пьесэнүүд олондо мэдээжэ болонхой. Александр Вампиловай зохёолнууд англи, белорус, болгар, испан, хитад, латыш, лезгин, монгол, немец, хэлэнүүдтэ оршуулагданхай юм.