874
Ородой Холбоото Уласай вице-премьер Дмитрий Рогозин мүнөөдэр «Улаан-Үдын авиационно заводто» хүрэбэ.
Урид ябаһанһаамни мүнөө заводой байдал һайжараа гэжэ Дмитрий Рогозин тэмдэглээд, Ми-171А2 түхэлэй вертолетодой сертификаттай болоһондонь баяр хүргэбэ. Тиихэдэ ород-энэдхэг түсэлөөр Ка-226Т түхэлэй вертолёт үйлэдбэрилхэ талмай түхеэрхэ тухай даабари үгэһэн байна.
«Вертолёты России» холдинг Росавиациһаа Ми-171А2 гэһэн олон үүргэтэй вертолёт үйлэдбэрилхэ сертификат абаһан байна. Тэрэнэй ёһоор Ми-171А2 түхэлэй вертолёдоор хүнүүдые, ашаа үдэр, һүнигүй, ямаршье уларилда, тиихэдэ ехэ уһан дээгүүр аюулгүйгөөр зөөжэ болохо. Энэ вертолёт уласхоорондын агаарай замда ашаглагдаха аргатай. Тиихэдэ Ми-171А2 түхэлэй вертолёт авиазавод олоор үйлэдбэрилжэ, коммерческэ захилнуудые бэелүүлжэ эхилхэ аргатай болохо юм. Дмитрий Рогозиной хэлэһээр, Улаан-Үдын авиазавод «Вертолёты России» гэһэн холдингын үндэһэн үйлэдбэринүүдэй нэгэн болоно.
Ми-171А2 түхэлэй вертолёт «А» категориин үнэмшэлгэтэй. Энэ хадаа эрхэтэдэй вертолёдуудта аюулгүйн талаһаа табигдадаг эгээл шанга эрилтэнүүдтэ тааранхай юм.
«Түсэл бэелүүлгэдэ энэ үнэмшэлгэ ехэ удха шанартай. Тэрэнэй хүсөөр коммерческэ захилнуудые бэелүүлжэ эхилхэ арга олгогдоно. Ми-8/17 түхэлэй вертолёдодуудые ашагладаг, Ород болон хари гүрэнүүдэй вертолёдой техникэ Ми-171А2 вертолёдуудаар шэнэлэгдэхэ», – гэжэ «Вертолёты России» холдингын захирал Андрей Богинский тэмдэглэбэ.
Ород-энэдхэг түсэлөөр КА-226Т түхэлэй вертолёт үйлэдбэрилхэ талмай бэлдэхэ тухай вице-премьер болон заводой хүтэлбэри шиидхэбэри абаха.
- Ород-энэдхэг түсэлөөр Ка-226Т түхэлэй вертолёт үйлэдбэрилгэдэ зохихо талмай бэлдэхэ тухай асуудал шиидхэгдэнэ. Үндэр хадатай газарта ниидэдэг Ка-226Т вертолёдтой болохо гэжэ энэдхэг нүхэднай һонирхоно, - гэжэ Ородой Холбоото Уласай вице-премьер хэлэбэ.
Дмитрий Рогозиной хэлэһээр, мүнөө дээрээ 200 вертолёт Энэдхэгтэ дамжуулха тухай хэлсэгдэнхэй. Саашадаа энэ хэлсээн үргэлжэлүүлэгдэхэ. Энэдхэг олон миллион ажаһуугшадтай баян гүрэн. Тиимэһээ Ка-226Т түхэлэй вертолёт дамжуулха гэһэн түсэл бэелүүлгэ хоёр гүрэндэ аша үрэтэй байха юм.
Анна Огороднигой гэрл зурагууд.
