657
Августын 15-19-нэй үдэрнүүдтэ Москвагай можодо Ородой Холбоото Уласай соёлой болон амаралгын «Патриот» паркда Бүхэроссиин сэрэгэй-тамирай «Илалта» нааданай түгэсхэлэй шата үнгэргэгдэнэ.
Ородой Холбоото Уласай Болбосоролой болон эрдэм ухаанай яаман, Баталан хамгаалгын яаман, «Залуушуулай эблэл» олониитын эмхи, «ЮНАРМИЯ» Бүхэроссиин хүүгэдэй-эдиршүүлэй сэрэгэй олониитын хүдэлөөн болон бусад энэ хэмжээ ябуулга эмхидхэнэ. Мүрысөөндэ Ородой Холбоото Уласай можо нютагуудай 700-гаад хүн хабаадаха юм.
Бүхэроссиин болон уласай сэрэгэй-тамирай наадануудта нэгэнтэ бэшэ илаһан Улаан-Үдэ хотын юрэнхы болбосоролой 8-дахи һургуулиин команда уласаа түлөөлхэ. Энэ һургуулиин хүмүүжүүлгын ажалай талаар захиралай орлогшо, «Патриот» түбэй хүтэлбэрилэгшэ Татьяна Хаптахаева һурагшадай бүлэг ударидана.
Нааданда хабаадагшад һаадтай зурууд гаража, буудажа, галта буу суглуулжа, задалжа хаба шадалаа туршаха юм. Тэдэнэр «Илагшадай харгы» тактикын нааданда хабаадажа, мүрысөөнэй дүнгүүд согсологдохо.
Сэрэгэй-тамирай "Илалта" нааданай сайтһаа гэрэл зураг абтаба.
