763
Мүнөөдэр, августын 20-до, Буряад Уласай Толгойлогшын уялга дүүргэгшэ Ярууна аймаг албанай хэрэгээр гаража, ажаһуугшадтай уулзаба.
“Озёрный” гэһэн хадын уурхайн үйлэдбэриин хойшолонгууд табин жэлэй туршада усадхагданагүй. Тиигэбэшье хэгдэһэн ажалнуудай һүүлээр гол горхон, нуурнууд хатана гэжэ Яруунын ажаһуугшад тэмдэглэбэ.
“Озёрный” үйлэдбэриин ажалаа эхилхэдэ, би залуу ябааб. Мүнөө үхибүүдни томо боложо, аша гушанартайшье болонхойб. Харин энэ үйлэдбэри үшөөл нээгдэхэл түсэбтэй. Гол горхонууд хатажа, нуурайшье уһан бага болонхой. Дайнай һүүлээрхи жэлнүүдтэ тэндэ загаһа баридаг һэмди. Мүнөө нуурта нэгэшье загаһан үгы”, - гэжэ Исингын ажаһуугша хэлэнэ.
Хадын уурхай үйлэдбэриһөө боложо, загаһанай хомор болоһон ушарһаа гадна, хүршэ Харга тосхондо эдихэ, ууха уһагүй. Хяагта аймагай Энхэ-Тала тосхондо баһал уһагүй, тэдэнэр худаг малтаха баатай боложо, үсөөхэн лэ айлнууд худагтай болоһон байна гэжэ һануулнабди. Харгын ажаһуугшадта зунай сагта уһа асардаг, харин үбэлдөө мүльһэ хайлуулжа, уһатай болодог байна.
Буряад Уласай Толгойлогшын хэлэһээр, эдэ асуудалнууд тухай мэдэнэб, “Озёрный” үйлэдбэриин барилга дүүргэхэ талаар мүнгэ һомологшодые бэдэрнэбди, 1,5 миллиард доллар мүнгэн хэрэгтэй.
“Энэ үйлэдбэри Швейцариин, Хитадай, Ород гүрэнүүдэй олзын хэрэг эрхилэгшэд харабашье, ажал хэгдэнэгүй. Энэ асуудалаар тэдэнэртэй уулзажа, хөөрэлдэһэн байнаб. Ородой Холбоото Уласай Юрэнхылэгшэ Владимир Путинай Хитадаар албанай хэрэгээр ябахада, “Озёрный” үйлэдбэри тухай түсэл бэлдэжэ харуулһан байнабди. “Атомредметзолото” бүлгэм харгы барилгаар һонирхоһон байна. Юундэб гэхэдэ, Хиагда хүрэтэр харгы татагдаха болоно”, - гэжэ Алексей Цыденов хэлэбэ.
“Озёрный” үйлэдбэри ябуулха талаар ажал хэгдэнэ, харин уһанай асуудалаар аймагай захиргаан шиидхэхэ гэжэ Буряад Уласай Толгойлогшын уялгануудые дүүргэгшэ тэмдэглэбэ.
Тиихэдэ Иисингэ хүрэтэр харгы 2017 оно болотор хэгдэхэ гэжэ хэлэгдэһэн аад, мүнөөшье тэдэнэр харгытай болоогүй байна. Энэ асуудалаар Буряад Уласай Транспортын, элшэ хүсэнэй болон харгын ажахы хүгжөөлгын талаар сайдай орлогшо Сергей Белоколодовой хэлэһээр, 2017 ондо харгы хэгдэхэ түсэбтэй байгаа. Харин барилга хэхэ эмхитэй асуудалнууд гаража, харгын барилга 2018-2019 онуудта хэгдэхэ болоо.
Иисингэ, Шиирингэ, Гүүндэ һууринай ажаһуугшад хурдан интернет холбоотой болохо гэжэ Буряад Уласай Толгойлогшын уялга дүүргэгшэ Алексей Цыденов хэлэбэ.
