Сентябриин 3-һаа 7 болотор “Нүүдэлшэдэй аян зам” гэһэн фестиваль Улаан-Үдэдэ үнгэргэгдэхэ юм.
Заншалта фестиваль “Үльгэр” театрай “Һалхинтай хөөрэлдэдэг” гэһэн шэнэ зүжэгөөр эхилхэ байна. Энэ зүжэг дээрэ театрай уран һайханай талые даагша Эрдэни Жалцанов хоёр жэлэй саана хүдэлжэ эхилһэн юм.
- Зүжэгэй гол үйлэдэгшэ нюурай прототип хадаа 19-дэхи- 20–дохи зуун жэлэй үедэ Монгол орондо ажаһууһан Түүрэй Банди гэһэн арадай домогто ороһон хүн болоно. Тэрэ хүн тулиһан зобоһон, үгытэй ядуу зондо туһалжа, үнэн сэхэ хэрэгэй түлөө тэмсэдэг, үгытэйшүүлые хашаһан ноёд, баядай адуу мал буляажа, үгытэйшүүлдэ тараадаг байһан гэхэ. Тиимэл монгол Робин Гуд байһан гэдэг, - гэжэ Эрдэни Жалцанов тайлбарилна.
Зүжэг багашуулда бэшэ, харин 16-һаа дээшэ наһатай харагшадта зорюулагдана. Театрта дуратайшуул сентябриин 3-да энэ зүжэг хараха аргатай. Зүжэгтэ театрай һүүдэрэй арганууд, багахан хүүхэлдэйнүүд, томо багууд болон уран нугархай пластика гэхэ мэтэ театрай шэнэ онол арганууд хэрэглэгдэнэ.
“Нүүдэлшэдэй аян зам” гэһэн фестивалиин һүлдэ тэмдэг – ниидэжэ ябаһан хүлэг морин. Тэрэниие уран зурааша Амгалан Ринчинов бүтээгээ. Фестивалиин хэдэн шэглэлнүүдээр илагшадта хүлэг мориной дүрсэ – шангууд барюулагдаха.
Фестивалиин үедэ Е.С. Деммениин нэрэмжэтэ Санкт-Петербургын марионеткэнүүдэй театр, Братск хотын “Тирлямы” гэһэн хүүхэлдэйн театр, Татарстанай “Экият”, Железногорскын “Золотой ключик”, Үбэр Байгалай “Тридевятое царство” болон Тыва Уласай хүүхэлдэйн театр зүжэгүүдээ харуулха юм. Япон болон Хитад гүрэнүүдһээ театрнууд айлшаар буухаар хүлеэгдэнэ. Хүүхэлдэйн театрнуудай ехэ наадан Улаан-Үдэ хотын гурбан томо театрнуудай тайзанууд дээрэ үнгэргэгдэхөөр түсэблэгдэнхэй.