Буряадай оперо болон баледэй театрай дуушан Михаил Пирогов Астана хотодо үнгэргэгдэһэн Евразиин хүгжэмэй уласхоорондын түрүүшын мүрысөөндэ хабаадажа, дипломантын нэрэ зэргэдэ хүртэбэ.
Буряадай дуушан мүрысөөнэй нэгэдэхи шатада амжалтатайгаар хабаадажа, түгэсхэлэй шатада 12 дуушадтай хамта дуулаха бэлиг талаангаа гэршэлбэ. Тэрэнэй дүнгүүдээр Михаил Пирогов VI-дахи шатын дипломоор шагнагдаба.
«ЭКСПО-2017» гэһэн Бүхэдэлхэйн уласхоорондын үзэсхэлэнэй хэмжээндэ тус мүрысөөн түрүүшынхиеэ үнгэргэгдэбэ. Казахстанай үндэһэтэнэй соёл урлагай дээдэ һургуули, Соёл урлаг дэмжэдэг Европын жаса хүгжэмэй мүрысөө эмхидхээ. Дэлхэйн арбан найман гүрэнүүдэй залуу хүгжэмшэд, дуушад мүрысөөндэ хабаадаһан байна.
Казахстанай арадай зүжэгшэн Айман Мусаходжаева, Ородой Холбоото Уласай оперын дуушан Любовь Казарновская, СССР-эй арадай зүжэгшэн Константин Орбелян, Пабло Сарасете гэгшын нэрэмжэтэ уласхоорондын мүрысөөнэй лауреат Карэн Шахгалдян, Казахстан уласай габьяата артист Шахимардан Абилов, Юрий Диденко болон Альберт Мамриев пианистнууд, Talent Music Master courses гэһэн Италиин академиин юрэнхылэгшэ болон уран һайханай хүтэлбэрилэгшэ Паоло Бальери, Казахстанай соёлой габьяата хүдэлмэрилэгшэ Тимур Урманчеев, Италиин скрипач болон дирижёр Пьерклаудио Феи, Турциин Бурса хотын гүрэнэй симфоническа оркестрэй захирал Гекче Озлер, Анкара хотын Гүрэнэй оперо болон баледэй театрай захирал, дуушан Метин Туран, Украинын түлөөлэгшэ, уласхоорондын мүрысөөнүүдэй лауреат Геннадий Кабка гэгшэд мүрысөөнэй жюриин гэшүүд болобо.
Хүгжэмэй түрүүшын мүрысөөндэ Казахстанай Эмиль Сакалов илаһан байна. Михаил Пироговтой хамта Ородой Холбоото Уласай үшөө хоёр түлөөлэгшэд, Валерия Савинская Азамат Цалити хоёр дипломантын нэрэ зэргэдэ хүртэбэ.
Һаяын үдэрнүүдтэ Михаил Пирогов нютагаа бусажа, сентябриин 13-да Буряадай оперо болон баледэй театрай элжээтэ хаһа нээлгэдэ табигдаха «Кармен» оперодо Дона Хозе гэгшын роль гүйсэдхэхэ юм.
Бурядай оперо болон баледэй театрай сайтһаа гэрэл зураг абтаба.