884
Хүүгэдэй уласхоорондын «Артек» түбтэ 2017 оной августын 7-һоо 27 хүрэтэр Уласхоорондын үндэһэтэнэй тамирай наадануудай түрүүшын фестиваль үнгэргэгдэнэ.
Энэ хэмжээ ябуулга Ородой Холбоото Уласай үндэһэтэнэй наадануудай болон олимпиин наадануудта ородоггүй тамирай мүрысөөнүүдэй эблэл, «Артек» түб дэмжэдэг жаса эмхидхэнэ.
Ородой Холбоото Уласай 22 можо нютагуудай, тиихэдэ 11 хари гүрэнүүдэй 600-гаад эдир тамиршад энэ хэмжээ ябуулгада хабаадана. «Морской» гэһэн лагериин түүдэгэй талмайда үндэһэтэнэй тамирай наадануудта хабаадагшадые амаршалгын баяр ёһолол үнгэрһэн байна. Энэ хэмжээ ябуулгада Хитад, Израиль, Киргиз, Нидерланды, Молдова, Казахстан, Беларусь болон бусад хари гүрэнүүдэй делегацинуудые угтан абаба.
«Уласхоорондын «Артек» түбтэ бүхы дэлхэйн үхибүүд амардаг. Тиимэһээ үндэһэтэнэй тамирай наадануудай фестиваль үнгэргэхэ гэһэн шиидхэбэри абаһан байнабди. Үхибүүдтэ элүүр энхэ, һайн амархыень хүсэнэб!» - гэжэ фестивалиин захирал Сергей Санин хэлэһэн байна.
Буряад Уласай команда шэлэн абалгын шата гаража, фестивальда хабаадаха болоо. Һур харбагшад, бүхэ барилдаашад, шатар наадагшад болон һээр шаагшад болон һоригшод – дүн хамта 28 хүнүүд уласаа түлөөлжэ, үндэһэтэнэй тамирай наадануудай фестивалиин мүрысөөнүүдтэ хаба шадалаа туршана.
Үхибүүд дэлхэйн арадуудай ёһо заншал болон үндэһэн наадануудтай танилсажа, мастер-классуудта хабаадаха аргатай юм. Нэрлэбэл, петанк, шаффлборд, регби, городки гэхэ мэтэ наадануудые, тиихэдэ тхэквондо айкидоһоо юугээр илгаатайб, хитад боксын илгаа гэхэ мэтые мэдэхэ болоно. Буряадай эдир тамиршад бүхэ барилдаан, һур харбаалган, шатар, шагай наадаар мастер-классуудые үнгэргэнэ.
«Артек ерэһэндээ, уласхоорондын фестивальда хабаадажа байһандаа би баяртайб», - гэжэ Станислав Тулуев хэлэбэ.
Үндэһэтэнэй тамирай наадануудай үедэ һур харбаан олоной һонирхол татаһан байна. Мэргэн буудагша болохоёо хүсэһэн үхибүүд эдэбхитэйгээр һур харбалгаар мастер-класста хабаадаба.
- Хүбүүд буудажа наадаха дуратай, тиимэһээ һур харбаан болохонь гэжэ мэдэхэдээ, үхибүүд олоор гүйлдэжэ ерээ. Бултыень мэргэнээр буудажа һургахабди, - гэжэ делегациин хүтэлбэрилэгшэ, һур харбалгаар Буряад Уласай суглуулагдамал командын ахалагша һоригшо Дарима Биликтуева хэлэбэ.
Фестивалиин хэмжээндэ эдир тамиршад Олимпиин наадануудай чемпионууд, космонавтнууд болон олониитын ажал ябуулагшадтай уулзаха. Һоригшод дүй дүршэлөөрөө хубаалдажа, тамирай һургуулинуудай хүгжэлтэ тухай зүбшэн хэлсэхэ.
