​"Үльгэр" театр ойн баяраа тэмдэглэнэ

Буряадай хүүхэлдэйн “Үльгэр” театр 50 жэлэйнгээ ойн баярые угтуулан, “Нүүдэлшэнэй аян” гэһэн уласхоорондын фестиваль үнгэргэнэ. Фестивалиин түрүүшын үдэр “Үльгэр” театр “Сайн эрэ. Һалхинтай сугтаа” гэһэн шэнэ зүжэг харуулба.

- Сайн эрэ гэжэ Эхэ орондоо эльгэ нимгэн хандасатай, арад зонойнгоо түлөө ами наһаяа үгэхэ тангариг нангин газарнууд дээрэ үгэһэн залуу хүнүүд гээшэ. Тэдэнэр ядаһан тулиһан зондо ходол туһалжа ябадаг байгаа. Эрэлхэг зоригтой, дээдын сэлмэг сэдьхэлтэй, үнэн сэхэ ябадалтай, бүгэдэндэ жэшээ болон ябадаг һэн. Тэдэнэр олзо оршодо обтожо байдаггүй, нэгэ моритой, орохо һэеы гэртэй, бэшэ ондоо юушьегүй байгаа, - гэжэ зүжэгые найруулан табигша Эрдэни Жалцанов хөөрэнэ. 

Урдын урда сагта болоһон ушар үльгэр домогоор хөөрэгдэжэ, харагшадай анхарал тон ехээр татаа. Шэлын Богдо Уулын нангин обоодо гаража, тангариг үгэһэн 9 бэрхэ сайн эрэшүүл тухай домог болон урдын сагай дуунууд харагшадай зүрхэ сэдьхэл хүдэлгэжэ шадаа. Элинсэгүүдэйнгээ заншалта байдалда һонирхол татуулһан үльгэр домог оршон үеын сагай эрилтэдэ таарама, зохидхон маягаар табигдаһан гэжэ харагшад тэмдэглэнэ. 

Табин жэлэйнгээ ойн баярые угтуулан, “Үльгэр” театр М. Хангаловай нэрэмжэтэ түүхын музей соо “Үльгэр. Театрай шэди. Амиды домог” гэһэн үзэсхэлэн дэлгэбэ. Эндэ элдэб түхэл, зүйлнүүдээр бүтээгдэһэн хүүхэлдэйнүүд, багууд табигданхай.

- Нэгэ дүрсэ, зүйл һарын туршада байгуулагдана. Тэрээн дээрэ найруулагшад, бутафорнууд, уран зураашад, оёдолшод гээд арба гаран хүн ажаллаа. Хүүхэлдэй бүхэн хүшэр оньһото аргаар, өөрын онсо шэг шарай, маяг түхэлөөр бүтээгдэнхэй, - гэжэ “Үльгэр” театрай захирал Баярма Дашидоржиева үзэсхэлэн нээлгэнэй үедэ тэмдэглээ бэлэй. 

“Сайн эрэ. Һалхинтай сугтаа” гэһэн шэнэ зүжэгэй болон М. Хангаловай нэрэмжэтэ түүхын музей соо “Үльгэр. Театрай шэди. Амиды домог” гэһэн үзэсхэлэнэй үедэ буулгагдаһан гэрэл зурагууд

Цырегма Сампиловагай гэрэл зурагууд