986
Буряадай арадай поэт Николай Дамдиновай 85 жэлэй ойдо зорюулан, буряад ирагууу найрагшадай зохёолнуудые уран уншалгын можо хоорондын IX-дэхи мүрысөөн 2017 оной октябриин 12-13-най үдэрнүүдтэ үнгэргэгдэхэ.
Буряадай арадай поэт, М. Горькиин нэрэмжэтэ РСФСР-эй Гүрэнэй шангай лауреат, Ажалай Улаан Тугай болон Арадуудай эб найрамдалай орденуудай кавалер Николай Гармаевич Дамдинов 85 жэлэй ойн баяр 2017 ондо тэмдэглэгдэхэ юм. Николай Гармаевич Буряад АССР-эй Уран зохёолшодой эблэлэй түрүүлэгшэ, СССР-эй Верховно Соведэй түрүүлэгшэ, Буряад АССР-эй Верховно Соведэй түрүүлэгшэ ябаһан намтартай.
Николай Дамдиновай зохёохы замда зорюулан, улас дотор хэмжээ ябуулганууд үнгэргэгдэнэ. Тэдэнэй нэгэн «Дүрбэн тэнгэри» гэһэн шүлэг уран гоёор уншагшадай мүрысөөн болоно. Энэ хэмжээ ябуулга Буряад Уласай Соёлой яаман, Болбосоролой болон эрдэм ухаанай яаман, Улаан-Үдын Болбосоролой хороон байгуулһан юм. П.И. Чайковскиин нэрэмжэтэ Соёл, урлагай колледж шүлэг уншагшадай мүрысөө үнгэргэнэ.
Буряад уран зохёол дэлгэрүүлхэ, олондо мэдүүлхэ, тиихэдэ зохёохы бэлиг талаантай залуушуулые дэмжэхэ зорилготой шүлэг уншагшадай мүрысөөн эмхидхэгдэнэ.
«Дүрбэн тэнгэри» гэһэн шүлэг уншагшадай мүрысөөн Николай Дамдиновай 75 жэлэй ойн баяр тэмдэглэхэ үедэ, тэрэнэй шүлэгэй нэрээр нэрлэгдээ. Тиихэдэ тэрэнэй дурасхаалыень мүнхэлэн, оюутадай, һурагшадай болон зохёохы бүлэгүүдэй дунда «Дүрбэн тэнгэри» гэһэн уласай мүрысөөн үнгэргэгдэһэн байха юм. Мүнөө жэлэй мүрысөөндэ Буряад Уласай болон Ородой Холбоото Уласай можо нютагуудай түлөөлэгшэд хабаадаха.
Уран уншалгын мүрысөөндэ ганса уншагша гү, али зохёохы бүлэгүүд хабаадаха. Тиихэдэ 10 наһатай хүрэтэр үхибүүд, 11-15, 16-22, 23-һаа аха зон наһанай бүлэгүүдтэ хубааран, уран зохёолнуудые уншаха аргатай юм.
Уран зохёолдо дуратайшуул хаба шадалаа туршажа, Буряад Уласай ирагуу найрагшадай зохёолтой танилсаха аргатай.
Радна-Нима Базаровай гэрэл зураг.
