819
Мүнөөдэр, сентябриин 20-до, үдэшын 18 сагта (Москвагай үдэрэй 13 сагта) Ородой Холбоото Уласай Юрэнхылэгшэ Владимир Путин Буряад Уласай Толгойлогшын уялгануудые дүүргэгшэ Алексей Цыденовтэй мүнөөдэр уулзаха.
Гүрэнэй хүтэлбэрилэгшэ улас дотор үнгэрһэн һунгуулиин кампани тухай хэлсэжэ, һунгалтада илаһан Алексей Цыденовтэй улас дотор ябуулха ажалай түсэбүүд тухай хэлсэхэ юм.
Һунгалтын ниитэ нэгэ үдэрэй удаа Ородой Холбоото Уласай Юрэнхылэгшэ можо нютагуудта һунгагдаһан хүтэлбэрилэгшэдтэй уулзадаг заншалтай юм. Байгша ондо Ород гүрэнэй хоёр можо нютагай хүтэлбэрилэгшэд томилогдожо, 16 можо нютагуудай толгойлогшонор һунгагдаһан байна. Тиихэдэ Яроослав, Киров, Рязаниин можонуудай, Мордови, Удмурти уласуудай болон Пермиин хизаарта хүтэлбэрилэгшэд тушаалдаа ороһон байха юм.
Алексей Цыденов Буряад Уласай Толгойлогшын тушаалда сентябриин 22-то орохо. Энэ ёһолол Буряадай гүрэнэй оперо болон баледэй театрта үнгэргэгдэхэ. Буряад Уласай Толгойлогшын тушаалда орохо ёһолол сентябриин 15-да үнгэрхэ байгаа. Харин энэ үдэр Буряад Уласай һунгуулиин комисси хуулин ёһоор һунгалтын дүнгүүдые дуулгаа гэжэ һануулнабди. Тиихэдэ Буряад Уласай Арадай Хуралай сесси сентябриин 28-һаа октябриин 3 болотор хойшологдоһон юм.
Энээнһээ боложо, Буряад Уласай Арадай Хуралай сесси хойшологдобо гэжэ олон зон багсаамжалһан байна. Юундэб гэхэдэ, Буряад Уласай Толгойлогшо Засагай газарай ажалшадые бүридхүүлхэ талаар хубилалта оруулха аргатай болоно. Буряад Уласай Арадай Хуралай гуримай ёһоор:
«Ажалшадые бүридхэхэ талаар, Ородой Холбоото Уласай можо нютагуудай хандалганууд, хуули тогтоолгын эдэбхи үүсхэл болон федеральна хуулинуудай түсэлнүүдые Арадай Хуралай хаража үзэхэ тогтоолнууд АрадайХуралай сессиһээ 15 үдэр урид оруулагдаха ёһотой».
Уласай хүтэлбэрилэгшэ тушаалда ороһоной удаа хубилалтануудые оруулха аргатай болохо гэжэ Буряад Уласай Арадай Хуралай түрүүлэгшын орлогшо Владимир Павлов тэмдэглэбэ.
«Буряад Уласай Үндэһэн хуулиин ёһоор һунгагдаһан Толгойлогшо гүрэнэй хоёр хэлэн дээрэ тангаригаа үгэхэ ёһотой. Тэрэнэй удаа Арадай Хуралай ажалай талаар хубилалта оруулха аргатай болоно. Тиихэдэ заатагүй Арадай Хуралай сессиһээ 15 үдэр урид», - гэжэ Владимир Павлов хэлэбэ.
Буряад Уласай Арадай Хуралай ээлжээтэ сессидэ үндэр сайдуудай ажалай талаар хубилалтанууд оруулагдахагүй. Теэд һунгамалнууд ээлжээтэ бэшэ сессидэ октябриин 6-най һүүлээр сугларха аргатай ха юм.
Юрэнхылэгшын мэдээсэлэй албанһаа гэрэл зураг абтаба.
