866
Мүнөөдэр, сентябриин 21-дэ, Буряад Уласай Арадай Хуралай Зүблөөн октябриин 3-да үнгэргэгдэхэ ээлжээтэ 25-дахи сессиин асуудалнуудые элирүүлбэ.
Арадай һунгамалнууд энэ сессидэ 43 асуудалнуудаар хэлсэхэ түсэбтэй байгаа, тэдэнэй 36-нь хуулинуудай түсэлнүүд, 7-нь- Арадай Хуралай тогтоолнууд. Тиихэдэ зүблөөнэй үедэ һунгалмалнууд зарим тэды хубилалтануудые оруулба.
«Буряад Уласай татабари гуримшуулха зарим тэды асудалнууд тухай» гэһэн хуулида хубилалтанууд оруулагдаха ёһотой байгаа, харин энэ асуудалаар дүүрэн ажал хэгдээгүйһээ боложо, энээн тухай сессин үедэ хэлсэхэгүй.
«Хуули бэлэн бэшэ. Олзын хэрэг эрхилэгшэдэй дунда энэ асуудал ехэ хэлсэгдээгүй, олзын хэрэг эрхилэгшэдэй эрхын талаар этигэмжэтэ түлөөлэгшэ энэ хуули дэмжэнэгүй», - гэжэ Арадай Хуралай эдэй засагай талаар хорооной түрүүлэгшэ Анатолий Кушнарёв хэлэбэ.
Буряад Уласай Арадай Хуралай Бюджедэй, налогуудай болон сан жасын талаар хорооной түрүүлэгшэ Зоригто Цыбикмитовай хэлэһээр, федеральна хуулида хубилалтанууд оруулха талаар ажал хэгдэнэ, тиимэһээ энэ асуудалаар удаадахи сессидэ хэлсэхэдэ таараха. Тиихэдэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураевта хуулинууд тухай хэлсэхэ болзор тухай һануулба. Асуудалнууд Арадай Хуралай ээлжээтэ сессиин 30 үдэрөөр урид хэлсэгдэхэ юм.
«Буряад Уласта биофармацевтикын үйлэдбэри хүгжөөлгэ» гэһэн хууляяар баһал удаадахи сессидэ хэлсэхэ.
Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хорооной түрүүлэгшэ Борис Ботоев “балконууд” тухай гү, али гэр, байшануудай газаа түхэл хубилгаха талаар асуудалнуудаар яарангүй, һайса зүбшэжэ үзөөд, хуули тухай хэлсэхэ дурадхал оруулба. Тэрэнтэй Анатолий Кушнарёв зүбшэбэгүй.
«Хотын захиргаанай харгы зубшан байһан гэрнүүдэй гадаа түхэл зохид болгохо хүсэл ойлгосотой. Мүнөө сессидэ энэ асуудалаар зүбшэжэ, 2018 оной апрелиин 1-һээ хуули хүсэндөө орохо. Энэ болзор болотор балконуудаа шэллэһэн хүнүүдтэ энэ хуули нүлөөлхэгүй. Харин апрелиин 1-нэй һүүлдэ балкон шэнэлхэ гэбэл, тэдэ зонуудта яажа хэжэ болохоб гэһэн эскизүүд дурадхагдаха. Тэдэнэр зохихо хэб шэлэхэ», - гэжэ Анатолий Кушнарёв тайлбарилба.
Буряад Уласай Конституционно сүүдэй түрүүлэгшэ болон судбянуудые томилхо ёһо гуримшуулха тухай ээлжээтэ сессиин үедэ хэлсэхэ юм. Тиихэдэ Буряад Уласай Тоололгын танхимай түрүүлэгшын орлогшын тушаалда Эдэй засагай сайдай нэгэдэхи орлогшо байһан, бага олзын хэрэг эрхилэлгэ дэмжэһэн уласай жасын түрүүлэгшэ байһан Михаил Егоров дэбжүүлэгдэһэн тухай хэлсэхэ юм.
Анна Огороднигой гэрэл зураг.
